Durante un conferencia di Prensa dialuna mainta, Minister Otmar Oduber, politicamente responsabel pa maneho di DOW, a lansa varios atake directo den direccion di EcoTech y EcoGas den su afan pa defende e compania estatal, Serlimar. El a cuestiona si EcoTech ta tanto preocupa cu Medio Ambiente di nos isla, cu con por ta posibel cu den pasado, prome cu a cera e contract pa hiba tur sushi na EcoGas, cu tabata tira “grofvuil” den un buraco na Moko. Un empleado di EcoTech a contesta mesora, “pasobra ta for di Gobierno mes nos a siña!”
Claro cu mesora a sali preguntanan adicional di con e contesta aki. A bin resulta cu tempo cu a tene un destaho publico pa tumba ex Bushiri Hotel abou, a inclui den dje cu tur desperdicio mester a bay dump na Parkietenbos. Sinembargo e compania cu a gana e destaho publico di DOW, a opta pa haci mesun cos cu varios otro, esta pa hiba e restonan di material di construccion pa e buraco na Moko. Tur esaki a sosode cu conocemento di tur e departamentonan di Gobierno, incluyendo Minister Otmar Oduber cu tabata den funcion caba. Parce cu den e restonan di material hasta tabatin asbest!
Ta comosifuera cu e Minister nobo di Infrastructura, bou cual periodo DOW a uza e buraco grandi na Moko pa tira su sushinan afo, no tabata na altura cu su departamentonan cu e mes ta politicamente responsabel pe tambe ta haci e mesun practica aki. Loke e fuente kier mustra ta cu, aunke Minister Oduber no sa of no a informa su mes bon prome, ta custumber cu ta uza “grofvuil” pa tapa e buraconan grandi cu tin na Aruba. E buraconan aki a bin debi na cobamento pa santo y piedra.
Gobierno di un banda a para e practica di yenamento di buraconan cu sushi seco, pero nan mes tabata uza un tereno na Gabilan pa e mesun tipo di practicanan asina. Ta mustra comosifuera cu ta bisa algo pero ta haci otro.
Ta bisto cu den e guera comercial entre Serlimar y EcoTech pa conkista e mercado di recogemento di desperdicio residencial y comercial, cu e mandatario ta demostrando claramente na cua banda e ta para y di kico tur e ta dispuesto pa haci pa laga e companianan priva mustra malo pa Serlimar mustra bon. Hecho ta cu EcoTech ta domina mas o menos 90% di clientenan comercial mientras cu Serlimar tin e mercado mas grandi di clientenan residencial. Hunto, EcoTech ta responsabel pa 60% di tur sushi di Aruba. Recientemente nan a celebra cu a yega nan di 6000 cliente residencial y a bisa cu tur dia ta hayando mas y mas clientenan nobo, cu tambe ta scoge pa servicio di calidad.
