E enfoke di DTI pa 2019, ta pa purba di haci e dienst mas eficiente, tanto paden como pafo. A bay purba di traha prome den e dienst y mira si por mehora e servicio p’aden y despues a cuminsa poco poco bay pafo.
Segun director Anko Koopmans, den 2019 hopi hende extra a haya sa kico ta DTI, principalmente den e parti di educacion, informacion. Tur cos ta purba di trece ariba y duna pueblo e mensahe kico DTI ta haci.
DTI hopi caminda ta envolvi. P’esey nan trabao ta encera hopi parti di diferente trabao. No solamente labor, pero tambe tin VK (Keurmento di Vehiculonan), tin instalacion di coriente, tambe midimento di pompnan di gasolin, balans na supermercado.
DTI ta envolvi den hopi tarea. Tin retonan den e servicio, principalmente si kier trece cosnan nobo, ideanan nobo, no ta tur ta bay di biaha den e mesun caminda cu bo kier.
Pa 2020 tambe ta bay bira un aña cu lo enfoca riba eficiencia. Ta trahando di baha e retraso cu tin y tambe ta bay wak con por mehora e parti di e trabaonan riba caya. Segun Koopmans, e VK ta mira un mehoracion grandi y principalmente cu a cambia e strategia of e proceso di trabao un tiki. El a mustra cu el a duna su fruto. Pero esey no ta nifica cu mester stop eynan. DTI tin cambionan ainda pa haci. Ta hasta pensando di haci algun cambio den e luga. Por ta lo bay cera e espacio di espera, pone airco y asina haci’e mas comodo pa e clientenan cu tin cu warda nan auto keur.
Tambe ta evaluando con pa automatisa un tiki di esey. E citanan, con ta bay drecha esey tambe. Tur ta puntonan pa 2020 pa por discuti y wak kico por haci pa toch haci e wardamento menos posibel y e servicio pa cliente bira mas optimal.
Ley
Anko Koopmans, director Dienst Technische Inspectie (DTI), den combersacion cu 24ora.com a bisa cu keurmento di autonan ta un obligacion pa ley. “No ta importa kico e ta, si ta auto of truck. Ta deber di cada persona cu ta tras di stuur pa percura pa keuring di e auto y DTI tin e obligacion di keur e auto.”
El a splica cu si un vehiculo no pasa den keuring, e doño ta haya un chens pa coregi e problema y trece e auto un biaha mas pa keur. E control riba caya naturalmente ta keda den man di Polis. “Esaki no ta tarea di DTI. Nos no tin autoridad pa esey. DTI ta realmente dependiente di esun cu ta bin keur na DTI. A ripara si cu ora polis ta cuminsa haci control, mas hende ta bin DTI. Esaki ta influencia e volumen di keurmento.”
Si nan no ta haci nan controlnan riba caya, DTI ta sinti cu ta haya menos hende pa bin keur. Na 2019 ta mas of menos e mesun cantidad cu 2018 den keurmento di vehiculo.
Control riba keurmento
Koopmans a splica cu DTI a cuminsa den e aña nobo aki pa recorda tur hende pa nan bin keur prome cu e dia di vencimento yega. E databasenan no tur ora ta 100%. Tin biaha tin un auto nobo cu no a registra ainda na DTI, y ta haya e papel bieu di e auto bieu cu ta esun su datonan tin disponibel. Tambe ta bay un suplica na tur persona cu si registra un auto, of ta haya un auto nobo, pa bay DTI y registr’e pa DTI tin tur informacion den nan database. Ta percura pa DTI keda up to date y pa e publico no haya carta por nada den bus.
Esaki ta algo cu kier ehecuta pa mira con e resultado ta y si e tin efecto riba e parti cu mas hende ta trece nan auto pa keur. Na final, no ta e placa ta interesante, sino e siguridad riba caminda. Pa Koopmans, mas hende e haya na DTI, miho.
Tambe tin hende cu no ta bin herkeur. Pero asina ey no ta cumpli cu e debernan cu un hende mester tin. “Esey ta pa siguridad no solamente p’abo, sino pa esnan cu ta hunto cu bo y banda di bo riba caminda. Ta deber di tur hende wak nan propio siguridad.”
Peso di e trabao
E trabao aki ta rekeri cu ta check cada auto y tin un checklist pa marca y bay riba dje. Esaki ta un rutina, cu hopi biaha mester move hende for di nan luga pa nan keda motiva pa traha. DTI tin mas of menos 10 hende trahando den e parti di keur. Tin otro departamentonan cu ta haci inspeccion p’afo cu ta den solo. E parti di keurmento mes ta den sombra. Pero tin hopi hende cu ta p’afo y cu ta haci inspeccion p’afo riba caya.
Tin hende cu tin biaha ta traha anochi, marduga. Ta yama DTI por ehempel pa coriente, pa gas, cu mester sali pafo di ora di trabao. “No por bisa cu ta trabao mas pisa, sino un trabao diferente. Pa cada departamento den DTI, e trabaonan ta specifica y nan por ta duro of no duro, tur cos ta depende di tur e opdrachtnan cu tin y exigencianan cu tin mester. Primordial ta cu ta mira e siguridad. Esey ta unda cu mester enfoca y esey ta loke DTI ta haci.”
Responsabilidad den e departamento
Koopmans a comenta cu e ta kere cu keurmento ta parti di e chef su responsabilidad, pa controla nan y esey ta loke nan ta bezig cun’e. P’esey e ta boga pa nan bin cu nan propio sistemanan pa controla.
