Despues cu na October ultimo a huramenta como Minister di Husticia, Siguridad y Integracion, ayera e Bufete di Abogadonan Gomez & Bikker (GoBik) a anuncia cu nan bufete a cambia pa Gomez Coffie desde awe 5 di mei 2018 y cu abogado mr. Bryan Coffie a bira un “partner”.
A cambia e nomber di e bufete, despues di salida di abogado Bikker pa Conseho di Minister. Andin Bikker a sali for di Bufete Croes, Wever & Thong mientras cu Dello Gomez a sali for di Gonzales & Zielinski. Ambos na un edad relativamente hoben a cuminsa un bufete y asina competi cu abogadonan renombra y cu bufetenan bon estebleci cu un lista largo di clientenan potencial. Asina mes GoBik masha lihe a crece y bira un di e bufetenan mas popular di Aruba y cu despues a expande su halanan pa otro partinan den Reino Hulandes, incluyendo oficina na Hulanda.
E union di Andin Bikker y Dello Gomez den Gomez & Bikker Law Office a bringa algun caso masha “high profile” manera ta e caso pa protesta contra e ley di glasnan getint y despues tambe pa kibra e monopolio di Setar riba comunicacion mobil. E ultimo aki a hinca e dos hoben abogadonan aki den historia legal di Aruba, pa a logra, via procedimentonan legal, kibra un monopolio di hopi aña y di e forma ey beneficia tur cliente di celular cu awe ta conta cu miho tarifa, miho cobertura y mas servicio debi na competencia.
E nomber y nan logo nobo pa Gomez Coffie ta refleha tanto e pasado di e bufete como tambe e caminda nobo cu lo encamina awor. Hopi exito!
