Na Corsou tin e mesun reglanan cu Aruba. Nan ta bin cu mercancianan cu nan no mag di bin cun’e segun minister Steven Martina. Por ehempel nan a bin cu hopi coco y nan no tin permiso pa bin bende coco na Corsou pasobra Corsou mes ta produci suficiente coco. Pero e coconan tey awor aki toch.
Bo ta haya tipo di situacionnan asina. Por ehempel nan a bin cu limonada for di Venezuela y a pone den un truck, ta bay bende. Tampoco ta cosnan cu por. Nan no tin permit pa haci esey. Ta ripara toch cu no ta semper nan ta tene nan mes na e reglanan y ta trece un situacion fastioso pasobra como autoridad tin cu actua. Nan ta haci como si fuera cu ta contra di nan ta, pero ta djis loke a haci ta e reglanan cu ta stipula, conbibi cu e reglanan ey. Na momento cu viola nan, gobierno ta actua.
Cosnan cu no mag di sali for di Venezuela
Venezuela tabata preocupa cu tin cosnan cu no tabata mag di sali for di e pais y tabata sali y yega e islanan. Esey tambe ta un di e motibonan pakico a pone e embargo. Tur hende sa, segun Martina, cu a cumbini cu e controlnan lo ta mas severo y efectivo y esey ta ehecutando. A informa e barco, e doño di e barconan y e agencia di e barconan aki, cu e control lo ta mas estricto y severo. Pesey e paisnan a cumbini cu otro cu nan ta bay haci pa contaresta contrabanda.
Satisfecho
Na Corsou nan ta basta satisfecho. A bin por ehempel un 6 pa 7 barco. Ora cu a haci e control dia 1 di Mei cu a pasa, a resulta cu tres di e barconan mester a cera nan, pasobra nan no tabata cumpli, cu nan rekisitonan. Di un otro banda, e otro barconan si tabata cumpli.n Cu esey a mustra cu por. Nan por tene nan mes na regla. Esnan cu no ta tene nan mes na regla, Autoridad Gubernamental, lo actua.
Relacion cu Venezuela
Awor aki e relacion ta basta bon, den e sentido cu e embargo a kita. Riba un nivel diplomatico tin hopi combersacion constantemente ta bay bin. Ta riba un ruta pa mantene e lasonan comercial, pero tambe diplomatico den un forma positivo.
