E homber Jesus Armando Piñeiro Lugo ta un homber procedente di Venezuela. E ta wordo considera un sicario cu awe ta cera pa atraco arma hopi serio riba joyeria. Pa colmo e ta na Aruba bou capa di Asilo.
Asina tin hopi mas cu ta causando basta daño na e seguridad di nos pais. Danki Dios cu nos cuerpo policial ta logra pone man riba e homber aki. E mesun sicario aki a hinca un empleado di Domesa den un problema basta serio. E empleado di Domesa ta deteni e momentonan aki como sospechoso den e caso di atraco.
E homber Ferdimar Maduro awe ta haye den un problema cu kizas e no tin nada di haber cune. Investigacion cu nos redaccion ta haciendo ta mustra cu amor ciego a costa e libertad di Ferdimar Maduro cu ta bay perde su trabou di mas cu diez aña na e empresa di transporta placa. Ferdimar ta casa cu Mary-Ley Croes y su casa a dicidi di “Fall in Love” cu e sicario atracador.
Den e caso aki Ferdimar mester a bandona cas y bay biba na su mama. Despues e sicario atracador Jesus Armando Piñeiro Lugo a cay deteni pa sospecho di atraco. Eynan e amor ciego a pone Ferdimar bay cas bek cerca su casa Mary-Ley Croes. Awe Ferdimar ta cera y den e investigacion e mester bay demostra cu e no tin nada di haber cu e caso di atraco unda e sicario Venezolano ta envolvi. Loke a pompa Ferdimar ta cu e auto cu su casa Mary Ley-Croes a keda cune tabata riba su nomber.
Y tur cos ta mustra cu e auto aki ta esun sospecha tambe di ta envolvi den e atraco. Esey a causa cu Ferdimar awe a perde su libertad. Logicamente Ferdimar Maduro no ta bay tira atraco cu e sicario cu a horta su casa bay cune.
Solamente su amor ciego a pone bay cas bek ora cu e sicario a cay cera y awor ta haye cu e situacion cu su nomber a cay basa riba e auto. Su casa a hinke den full e bada bada aki.
Awor aki tin sigur tres detencion entre otro pa e atraconan serio riba Joyeria. Bo tin e sicario Jesus Armando Piñeiro Lugo y su amante Mary-Ley Croes. Tambe tin Ferdimar Maduro cu ta casa di Mary-Ley Croes. Si nan keda cera y bay KIA, kizas rivalnan lo topa otro den presencia di e casa of amante.
