Ta parce cu ora a anuncia e proyecto di St. Regis Aruba, hopi hende no a realisa cu e lo ocupa un pida tereno basta grandi entre Divi Phoenix y Riu Palace Antiyas. Cu esey, na dado momento e edificio di Strand Politie lo mester bay y e beach eynan lo ta dedica pa huespednan di e hotel. Probablemente e lo no ta exclusivo, pero nos tur conoce e storianan dilanti e otro hotelnan High Rise unda ta pone palapa y stoel di lama cu ta di e hotel, strobando e opcion pa localnan por disfruta di e area.
Siman pasa e desaroyado di St. Regis Aruba, esta Walter Stipa, e inversionista Venezolano cu ta e mesun doño di Ritz Carlton Aruba, a start cu trabounan di preparacion y construccion. A laga cera e area cu un cura, pa asina wanta tur hende for di su tereno. Walter Luciano Stipa ta doño di varios compania, incluyendo Desarrollos Newco 22, C.A., Desarrollos Hotelco Corporation Curacao Holding N.V., Desarollos Hotelco Corporation Aruba Holding N.V., Desarrollos Hotelco Corporation DHC Aruba N.V. y Desarrollos Hotelco Corporation Aruba Holding C.A.
Publico cu ta custuma di haci uzo di e beach banda di Strand Politie a topa cu cura halto, area cera y tapa, a keda hopi asombra. Awe nan a yama na 24ora.com pa mustra nan preocupacion y desapunto cu nan lo perde nan area di recreo. Aunke cu Gobierno ni e desaroyado a menciona esaki ainda, nan sa cu ora e hotel aki keda cla, e beach lo bay pa su huespednan y cu lo haci tur posibel pa wanta localnan mas leu posibel.
Por lo menos un di e ciudadanonan cu a hiba palabra awe na Palm Beach a conta cu tur siman e ta bishita e mesun sitio aki y e ta custuma cune. E no ta di acuerdo cu a cera e area pa construccion di un hotel, es mas, Aruba no kier mas hotel tampoco! Un otro ciudadano a conta cu e tin 30 aña bishitando e mesun sitio, cu su pareha, cu a bira su casa, cu su yiunan y awendia e ta eynan cu su nietonan. Asina di generacion pa generacion a keda bay e mesun area di Palm Beach pa pasa diadomingonan.
Ta bon pa bisa cu entre e ciudadanonan cu semanalmente ta bishita e beach aki, tin tambe nos ex-Prome Minister Nelson O. Oduber cu ta cana y core den e area y despues ta sambuya na e mesun sitio aki. No di awo, sino pa hopi aña caba!
E storia di e tereno aki
Aruba ta cla pa construi un otro hotel na nivel di 5 strea, St. Regis Hotel na Palm Beach. Ta resulta cu e storia di e tereno aki ta hopi largo, mas cu hopi hende ta imagina. El a pasa den asina tanto man durante e ultimo decadanan aki, pero semper cu e mesun meta, esta pa traha un hotel eynan. E intencion awor a cambia, di un hotel Time Share pa un hotel normal (EP) di 5 strea y di 200 camber.
Tereno otorga por lo menos 50 aña pasa
E tereno aki tabata den forma “eigendom” y perteneciendo na Aruba Palm Beach Club di Gai Eman. E aña exacto cu a otorga e tereno no ta conoci, pero e club tabata existi prome cu cualkier otro hotel a habri riba e strip ey. Na dado momento, dor di debe cu e club a acumula y no por a paga, Aruba Bank a tuma e club over y e tereno. Ta bon pa bisa cu pa e tempo ey, e tereno aki tabata un di e miho nan di Aruba, cu cara pa lama y cerca di beach, miho no por tabata kier!
E tereno a pasa di Aruba Bank pa Aruba Hotel Enterprizes
Aruba Hotel Enterprizes ta funda hopi aña pasa pa entre otro Dr. Eloy Arends, Michael Ruby di Washington DC y Eduardo de Veer. E intencion tabata e tempo ey pa busca financiado y cu e compania local, desaroya un hotel grandi na Aruba. Tur wowo tabata riba Hyatt Regency, pero na ultimo momento e cadena a cambia di plan y a introduci Jose Joaquin Gonzales Gorondona for di Venezuela, cu a cumpra Aruba Hotel Entreprizes over y a desaroya Aruba Concorde Hotel & Casino. Cu tempo e comerciante a traha Concorde Hotel na Isla Margarita tambe, na Venezuela. Ta den e cuadro pa desaroya y amplia e propiedad di Aruba Concorde Hotel & Casino, Gorondona a cumpra e tereno di Aruba Palm Beach Club for di Aruba Bank.
Aruba Hotel Enterprizes a pasa pa otro doño
Cu tempo, e conocido Alfonso Riverol, tambe procedente for di Venezuela, a cumpra Aruba Hotel Enterprizes for di Jose Joaquin Gonzales Gorondona. E tabata esun cu a pidi Gobierno di Aruba e tempo ey pa mas tereno ainda, separa di esun original di Aruba Palm Beach Club, pa e por a desaroya un hotel nobo di Time Sharing. Ora a pidi pa mas tereno, den cuadro pa por tin e terenonan hunto, el a opta pa cambia e tereno “eigendom” pa “erfpacht”. Mester bisa cu e proyecto aki sinembargo nunca mas a bay dor. Na aña 2004 a cuminsa e proceso pa pasa e tereno di Aruba Hotel Enterprizes pa Caledonia Properties NV, di e mesun Alfonso Riverol. Un ke otro a keda cla na aña 2006, ora Minister Marisol Lopez-Tromp a firma pa traspasa e tereno aki di un compania pa otro, aunke e ta erfpacht. Es mas, den e mesun acta aki a duna nan un pida tereno adicional den e “wetland” banda di The Mill Resorts, pa fungi como parkeerplaats di e hotel nobo.
Tereno a bin cay den man di Starwood
Na momento cu Alfonso Riverol a bende Aruba Hotel Enterprizes cu Belfonti Capital Partners, tur e propiedadnan aki y e tereno a pasa tambe den e acta di benta. Cu tempo e cumprado nobo no por a cumpli cu su debe, cu consecuencia cu e banco a bay cu e compania y e propiedadnan den beslag. E banco, pa por a baha su “exposure” cu e debe grandi y e propiedad cu no tabata alcansa e suma presta, a bende e tereno cu e compania Starwood di Merca. Starwood tabata operando e hotel pa e banco. Despues cu Marriott International a cumpra Starwood, e tereno a pasa tambe pa nan. Ora di bende e propiedad di banco pa Riu Hotels, e pida tereno ey no a bay den e benta. El a keda tur tempo den man di Marriott.
Marriott kier a bende e tereno pa 17 miyon dollar
Entre aña 2013 pa 2017, abogadonan di Marriott Resort Aruba a presenta na Gobierno di Aruba cu e peticion pa bende “nan” tereno erfpacht cu Desaroyos Hotelco di Walter Stipa pa e bunita suma di 17 miyon dollar. E tempo ey e Minister di Infrastructura a nenga di coopera, pasobra e hotel ta bendiendo un tereno propiedad di Gobierno pa un suma asina halto. Tambe a tene cuenta cu e scarsedad di beach eybanda pa acomoda mas turista pasobra ya caba The Mill Resort (cu un djis o bira Marriott Courtyard) ta uza e mesun pida beach ey pa su huespednan. Esaki sin conta cu nos propio ciudadanonan semper gusta bishita e beach eynan, net dilanti Strand Politie.
A duna Marriott permiso pa traspasa e tereno toch
Mester menciona cu dia 29 di augustus 2017, menos di 1 luna prome cu eleccion, Ministernan Mike de Meza y Benny Sevinger a firma un carta pa abogado Johan Sjiem Fat, den cual nan ta bay di acuerdo cu e cambionan den e condicionnan bou cual a otorga e tereno “erfpacht” na Caledonia Properties N.V. Den e carta aki ambos Minister a acorda cu Marriott, cu a cumpra Starwood, lo por pasa e tereno aki pa un otro compania (of desaroyador) si nan bay di acuerdo cu nan condicion cu lo opera un hotel di nan marca na e sitio. E tempo ey a acorda cu ta cambia e condicion di traha un hotel Time Share, pa un hotel regular y casino cu 350 camber, compaña pa tur otro facilidad cu normalmente ta otorga na un propiedad asina. Cu e carta aki bou man, ta haci masha dificil awor pa stroba e compania di desaroya e mes of laga un otro desaroya un hotel di su marca na e mesun sitio aki.
Carta Ministernan Sevinger-de Meza
Gabinete Wever-Croes a adopta e proyecto y a sigui cune
E proyecto di Sr. Regis Hotel Aruba di Desaroyos Hotelco a pone e prome piedra pa construi e hotel di 200 camber, situa entre Riu Antillas y Divi Phoenix, dilanti di Strand Politie. Ta trata aki di un inversion di 170 miyon dollar, na man di e Desaroyos Hotelco di e conocido Walter Stipa, cu ta e mesun doño awor di e edificio di Ritz Carlton Aruba. Stipa na Venezuela ta propietario di varios hotel di e mesun marca aki, manera Ritz Carlton, Marriott y Renaissance, pa menciona algun. Ta pronostica cu lo dura 3 aña pa caba di construi e hotel. Den e proceso lo muda e Warda di Polis pa un otro sitio.
Tocante Aruba Palm Beach Club
Masha poco hende kisas ta corda cu e sitio indica unda lo bay construi e hotel nobo, den pasado tabata un di e prome clubnan social di nos pais, esta Aruba Palm Beach Club. E tempo ey no tabata existi J.E. Irausquin Boulevard mes eydilanti y ta for di Saliña mester a crusa riba un caminda di santo pa yega eynan. Unda awe ta Holiday Inn Hotel tabata Club POVA di Polis. Prome cu e bin desaroyo di hotel na Aruba, ta e dos clubnan social aki tabata existi riba e beach. Ey e pueblo tabata acudi pa entrene nan mes na lama den fin di siman. Aruba Palm Beach Club por ehempel tabatin un bar, un restaurant, baño y lockerroom pa cambia paña of warda tas mientras cu ta bay landa den laman. Presidente di e club tabata Gai Eman.
Tocante St. Regis Hotels & Resorts
St. Regis Hotels & Resorts ta un cadena di hotelnan luhoso, cu ta forma parti di Starwood Hotel Group, cu ta doño di Marriott International. E cadena di hotel aki a inicia desde aña 1904, ora cu John Jacob Astor IV a habri St. Regis Hotel na New York City, na Merca. Starwood Hotel Group a cumpra e cadena aki na aña 1999. Te cu aña 2017, tin un total di 62 hotel cu ta carga e nomber di Sr. Regis rond mundo.
