Un poco prome cu 9’or di anochi ta sosode un accidente serio na Savaneta, den vecindario di entreda pa bay direccion di Marinierskazerne na Savaneta.Polisnan cu a yega na e sitio, a topa cu un homber tira na suela memey di caminda.
A resultado di ta e conoci di Polis Preke, kende hopi biaha asistencia ta wordo pidi p’e pero na Playa.
Preke tabata para na e banda di caretera di Playa pa San Nicolas. Na otro banda di caminda tabatin un persona para cu un flashlight. Preke a bay cruza caya, pero no a paga tino. El a haci esaki dilanti un auto marca Spark numera A 37843, cu tabata bahando di San Nicolas pa Playa.
Practicamente Preke a cruza caminda ora cu e vehiculo tabata hopi cerca. “Mi a purba brake, pero e tabata asina cerca cu mi no a logra para,” e chauffeur femenino a conta Polis. Por a mira cu e rastro di brake tabata di menos cu 20 meter. Door di e impacto, Preke a dal den e windshield net banda di e chauffeur pa despues cay.
Polisnan a atende cu Preke mientras cu tabata spera yegada di Ambulance, ya cu un rato prome tabatin un caso di maltrato / hincamento na De Vuijst y un accidente un poco mas pabou na Savaneta.E herido tabata keha di dolor na su pia y lomba y tabata drumi den posicion fetal for di e momento cu el a cay te ora cu e paramediconan a atende cun’e. Despues di a stabilis’e a bay cun’e hospital.Preke ta mas conoci cerca Polisnan di Playa. Constantemente e ta cana subi caminda of ta bisa cu e ta drumi riba caminda. E tabatin suerte cu nunca antes el a wordo alcansa pero e biaha’ki e caso tabata diferente.
