Cu hopi satisfaccion mi a lesa den corant cu minister Ursell Arends a pone un paro temporal pa duna permiso na compania di deporte acuatico (watersports). MASHA DANKI minister. Pero ami ta bay uza e decision aki pa bay un poco mas leu. Ami ta bin cu e peticion pa stop completamente cu tur e sorto di watersports aki, unda e botonan aki ta usa combustibel y ta maneha e botonan na un velocidad halto y peligroso. Mi sa di antemano cu esnan cu tin un negoshi den esaki lo sapatia. Mi ta bay splica e pakico mi ta contra e watersportsnan aki. Dia a traha e ley pa duna e sorto di watersports aki permiso, mi tabata Secretaris di Raad van Advies. Nos a tende varios persona di Medio Ambiente. Un di nan a splica dicon e ta contra di esaki. El a splica cu e combustibel (benzine, gasolina etc) cu e botonan aki ta uza, ta drenta den lama y sak te na e santo. Eynan e ta keda drumi y ta bira manera un lodo. Bo NO ta sinti e santo blanco los, bou di bo pia. Nan a conta cu esaki a pasa entre otro na Cancun te cu turismo a cuminsa bay atras. No solamente e santo di laman dilanti di e hotelnan a contamina bira lodo, pero tur e parti te dilanti di aeropuerto. Un laman bunita y calmo cu ta invita bo pa landa, pero asina bo drenta bo ta sinti e lodo (slip). P’esey hopi turista ta core bay sea Mangel Halto of Baby Beach. Na e hotelnan mes nan ta conseha turista pa bay otro beach. Un par di biaha mi a skirbi den Facebook pa NO admiti e watersportsnan aki na e beachnan aki. Tuma como ehempel e accidentnan cu a pasa. Esey ta mortal pa nos turismo. Awor a cuminsa traha un hotel banda di Rodgers Beach y Baby Beach. Kisas bon pa e economia pero mester tene hopi cuenta cu e Medio Ambiente. Por fabor, nada di e watersports cu boto cu ta uza gasolina, diesel etc.
E pregunta e ora ey ta bira, cua atraccion tin pa e turistanan? Na prome luga lo ta bon pa pone un separacion entre e parti cu ta solamente pa hende landa y e otro atraccionan. Ke hubo di uza kayak, sailboat (velero chikito /mediano) y e peddle unda hende ta peddle para. Hende ta sinti nan mes mas sigur y proteha. Nos beachnan lo recupera pero tambe nos turtuganan lo keda hopi agradecido. Mira tortuganan chikito sali di nan neshi, ta algo inolvidabel. Pa e turistanan tambe e ta algo maravilloso.
Otro problema ta e ATV/UTV cu ta causa hopi accident. Ayera mes tabatin otro accident. Nan ta daña nos duinen. Nos flora y fauna. Nan ta un peliger pa e trafico. Riba FB a publica un foto di un conenchi mama pa un di e vehiculonan aki. Su paden cu babies plama banda di dje. Esta tristo. A yega di pensa riba alternativo? Ke hubo di ofrece na hotelnan foyeto cu diferente hiking trails. Nos tin hende Arubiano cu ta gusta hike y cu por duna algun idea. Ami tin un: un hikingtrail pa Cas Tan Tin cu ambiente Arubiano. Nos hende bisti den paña di antes. Un caha di orgel cu ta toca nos piesanan. Cos dushi tipico Arubiano manera cocada y otro cos dushi. Presentacion di un baile tipico manera masurca. Un artesano cu ta traha pochi di klei y tin algun traha caba pa bende. No ‘made in China’ of ‘Taiwan’ pero na Aruba cu dibuho tipico di nos. Awa di Coco fresco pa bebe. Turistanan ta keha pa hopi aña caba cu nos isla ta “Americanisa” y cu nan no ta wak nada di nos propio cultura. E presentacion na Willem III Toren ta algo bon pero falta mas. Esaki ta un par di idea.
Mas cu 40 aña pasa mi a traha mi cas na Mangel Halto. Mi famia tabata feliz, canti lama. Despues nos a presencia 2 biaha un ‘oilspil’. Nos a yora di wak con e beach y e mangrovenan a ser mancha cu zeta preto. Nos a wak piscanan saca nan cabes riba awa y hap pa haya poco oxigeno. Pa tapa loke a ser susha y mancha a tira santo blanco riba e beach. A tuma hopi aña pa e petroli pega riba e mata di mangrove a cuminsa disparce. Awa di laman tabata drenta paden y duna tur e mangrove awa. Esaki tabata broeikas pa hopi pisca. Awor aki no tin nada mas di esey.
Mangel Halto a bira un luga turistico unda tur dia hopi hende ta bin landa y scubadiving. Pero e caya di Spaans lagoenweg ta na werki. Minister Dangui Oduber, please bin tira un bista. Si resta un poco di asfalt, please drecha e caya aki. Nos vecindario tin por lo menos 4 carta aden cu e peticion aki, tanto na DOW y na bo persona.
Minister Ursell Arends, mi ta pidi bo di curason pa elimina e watersport ey cu boto cu ta uza combustibel y cu ta ser maneha di un manera iresponsabel cu ta causa accident y duna Aruba un mal nomber den exterior. Por fabor, di berdad: INVERTI DEN NOS PLANETA. CUMINSA CU ARUBA.
Mr. Alida (Lily) Marval
