Diamars siman pasa, un turista a entrega denuncia di su creditcard horta, cu supuestamente nan lo a uza den un barbershop. Esaki a trece un barberia local den un mal imagen pa cual nan a reacciona riba e suceso aki. Alejandro Arrow, trahado di Alex Barbershop, a splica cu e mes no tabatin nada di haber cu hortamento di e carchi horta.
El a conta cu e dia ey, un meneer, cu e conoce como un cliente, a yega na e barbershop y a puntra pa Alex, doño y esun encarga cu e barberia. Ora cu a bis’e cu Alex no t’ey, e persona aki a bay na e mashin di swipe y a uza e carchi. Esey tabata e motibo pa cual e polisnan a bin na e barberia.
Alejandro Arrow a sigura cu e no ta esun cu a uza e carchi, djis cu e dos personanan aki a bin den barberia a haci esaki. E conoce un di e personanan, bou di e ‘bijnaam’ Corsou, pero no cu e conoce pa nomber of sa unda e ta biba.
Arrow a sigui bisa cu polisnan a verifica cu su declaracion ta cuadra cu loke ta pasa den e videocamara. El a sigui bisa cu ta prome biaha cu e ta pasa den algo asina. E no kier pa hende pensa cu ta e ta esun cu a comete e fechoria aki. E no kier pa susha su nomber, pa e mantene su nomber limpi di cualkier delito. Despues di tabata deteni pa seis dia, el a recobra su libertad y no ta sospechoso mas den e caso aki.
REACCION PROPIETARIO
Alexander Ruiz, propietario di Alex Barbershop, a splica cu en berdad a uza e mashin. Na momento cu a uza e mashin, e no tabatey na e establecimento. E ta nenga cu nan lo a comunica cu ne y pa casualidad e dia ey, su telefon tabata corta, pues e no tabatin comunicacion e dia ey. Riba e dia aki, e persona aki a abusa di confiansa di Arrow y a gañ’e cu e tabatin contacto cu su persona. E mes no tabata sa di nada.
Ora el a yega e establecimento, pa su sorpresa el a haya polis den su barberia. El a tuma contacto cu banco, cu a saca e rapport y a haci tur tramite necesario pa blokia e transaccion aki. Esaki a haci tambe cu e no a perde su mashin di su negoshi.
E ta trece su banda di medaya pa asina pone e pueblo na altura, cu ni su persona ni su trahado no tabatin nada di haber cu e suceso aki. Pero esunnan mes cu a comete e delito, ainda ta canando rond eyfo.
