Mester laga pueblo evalua si nan ta haya cu e situacion aki ta uno pa laga Aruba sin un gobierno, na momento cu Aruba mas tin mester, mirando cu ta den tempo di crisis. Esey ta loke cu Alan Howell a comenta, durante un conferencia di prensa di partido POR.
E ta splica cu siman pasa diamars a haya carta di Landsrecherche cu lo bay haci un investigacion riba fondo di e fraccion y tambe ta pone beslag riba un cuenta di dje. Den e carta no ta para kico e caso ta ni pakico. Djis a bisa pa haci un investigacion penal. Tampoco no tin un sospecho. Como polis e sa cu ta posibel cu por tuma algo den beslag sin por tin sospechoso.A pesar e tabata un shock grandi pa hay’e den e situacion y te awo no sa pakico di kico ta trata e caso.
Na momento cu a haya e carta a bay traha y durante cu ta sinta, whatsapp ta zona y mira cu ta haya informacion di sostenedonan cu tal cos a sali, cual ta un comunicado di Ministerio Publico, kico ta pasando cu ne. El a keda sorprendi, mirando e comunicado, e tabata diferente di e carta cu e mes a haya.
Despues di esey a haya yamada di prome minister y a puntra kico ta pasando. El a contesta cu e no por bisa hopi, y a bis’e di e caso. Alan Howell a comenta cu a haya notificacion despues di un rato cu gobierno a cay, sin cu e mes sa. El a haya yamada di un amigo puntrando esey, cual e mes no sa. Con ta posibel cu un gobierno a cay den un fraccion di minuut. Un gobierno responsabel den tempo di crisis, lagando e pregunta aki cu yen di pregunta.
Riba dje, e ta un di e lidernan di fraccion di e gobierno aki tambe cu ta na cabes. No por compronde con ta posibel cu no a yama un reunion cu e tres lidernan splicando kico ta pasando of puntra kico ta pasa. E mes te ainda no a haya chens pa mustra y proba su inocencia.
E ta comenta di no a haya oportunidad ni pa splica ni brainstorm kico e por ta. Kisas nan tabata sa kico tabata pasando. Te ainda hende ta puntr’e con ta posibel cu gobierno por a cay den algun minuut.
Temporada di campaña ta aden. E sa bon cu prome minister kier a laga gobierno cay. No ta husto pa maluza un momento, tira e gobierno abao riba nomber di Alan Howell pa asina laga gobierno cay, laga e pais sin un gobierno y djey pa grita cu kier mandato cla riba dje. Ta un falta di respet total. Dun’e oportunidad pa por proba su mes y splica kico ta pasando.
