Durante tratamento di presupuesto di DOW den Parlamento, Parlamentario Alan Howell tabatin diferente pregunta pa loke ta trata desaroyo y proyectonan na San Nicolas.
Un di e preguntanan clave cu e parlamentario di POR a toca ta Carnival Village cual e ta considera un bunita proyecto pero cu pa un of otro motibo a keda na aros con coco. Ta trata di un proyecto cu mester tabatin diferente fase pero a yega te fase uno solamente. Pesey e ta puntra cual ta e diferente fasenan, kico minister lo haci cu Carnival Village y den ki tempo lo por mira desaroyo akinan.
Minister Oduber a indica cu e si tin interes pa Carnival Village y cu e ehecusion di e fasenan lo cuminsa e aña aki mes na beneficio di habitantenan di San Nicolas cu lo por uze, no solamente pa actividadnan di Carnaval, pero tambe pa otro metanan.
Otro pregunta relaciona cu pariba di brug ta si e proyecto di polisnan drumi lo continua. E ta considera e proyecto aki un positivo cu a yuda hopi cu e aspecto di siguridad. Algun di e cayanan cu lo desea haya e polisnan drumi ta Caya Jose Geerman, Seroe Preto, Mabon y e caya cu ta core den Noord Cura Cabay den direccion di misa di Brazil.
Relaciona cu e beach na Cura Cabay, Alan Howell a bisa cu por a mira un apertura hopi bunita, cu habitantenan a keda hopi contento, piscadornan a keda feliz, pero keto bay por bira cu e kiosko no ta den funcion. Lo desea mira e kiosko o habri unda ta bende pisca fresco y tin cualkier actividad eynan pa tin mas movecion pariba di brug. Lo desea di sa ki dia e kiosko lo habri. Tambe lo desa di sa si e problema cu tabatin cu e wcnan a keda regla y si tin personanan caba cu ta encarga cu e kiosko.
