Riba diaranson 7 di juni a tuma luga e di dos dia di inscripcion y momento pa busca material pa e My Guardian Group Walk & Run 2023. Cu orario extendi te cu 9:00 pm, pueblo tin e oportunidad di pasa y inscribi p’e magno evento aki cu lo tuma luga riba 11 di juni proximo.
Apart di diamars y diaranson, riba diahuebs 8 di juni tambe tin oportunidad pa inscribi personalmente y ricibi e materialnan necesario p’e evento aki. T’e momento ideal pa tur cu a pre-registra algun siman pasa via e website di Guardian Group pa pasa y haci e pago necesario.
A mira no solamente persona individual presenta n’e oficina principal di Guardian Group pero tambe den grupo. E cantidad di persona p’e evento aki ta limita, lo acepta te cu un maximo di dos mil persona. E participantenan lo ricibi un bunita T-shirt di Guardian Group acompaña pa su BIB-nummer y un bril di solo.
Esaki t’e di nuebe edicion di e My Guardian Group Walk & Run. E biaha aki lo tin dos opcion. Sea esun di 6KM of di 10KM.
Pa 6KM, ta cuminsa for di Guardian Group y ta turn around na Eagle Beach y pa 10 KM tambe ta cuminsa for di Guardian Group y ta turn around na Butterfly Farm. E evento ta cuminsa pa 6:00 am riba diadomingo 11 di juni proximo.
