Diabierna ultimo, Aruba Hotel & Tourism Association (AHATA) a tene un asamblea general bon atendi na The Ritz-Carlton, Aruba. AHATA ta organisa 3 asamblea general cada aña, y den cada asamblea e Presidente y CEO, Tisa LaSorte, ta informa e miembronan di e cantidad di esfuerso y actividad di e asociacion. Ademas, ta invita orador pa cubri diferente topico al caso. E biaha aki a invita Martijn Balkestein, Director di Camara di Comercio Aruba y ex-director di CBS, pa duna e miembronan un presentacion di e bestaansminimum na Aruba.
Bestaansminimum (na ingles “subsistence level”) ta referi na e suma minimo mensual cu ta necesario pa un persona of famia por funciona na un forma etico y socialmente aceptabel. Esaki ta diferente cu minimumloon, cual ta e suma di salario minimo segun ley. CBS (Oficina Central di Estadistica) ta calcula e gastonan necesario di un famia y regularmente ta adapta e calculacion pa refleha e cambio den costo di bida. Ultimo calculacion di 2022 ta indica cu un persona tin necesidad di AFL 2,403 pa luna, y un famia di 2 adulto y 2 yiu tin necesidad AFL 5,046 mensualmente.
Cu e presentacion aki, AHATA kier a conscientisa su miembronan di e diferencia entre minimumloon y bestaansminimum. E topico ta uno relevante pa dunado di trabou, considerando cu Aruba ta experienciando inflacion y tin un reforma fiscal na caminda cu lo hisa e costo di bida mas.
AHATA ta consisti di 140 compania miembro y ta boga pa e sostenibilidad di Aruba su turismo y economia, y siguransa di progreso socio-economico den nos comunidad.
