Si tur cos bay bon, hues lo dicta un sentencia tentativamente riba dia 26 di maart proximo. Ta trata aki di un caso cu Aruba Airport Authority NV a entama contra 11 trahado, di cual e kier pa hues duna un retiro obligatorio cu e pakete cu tin riba mesa awo. E sindicato di otro banda no kier tende di retiro ni pakete, sino mas bien kier hues nenga e peticion y conserva trabou di e grupo aki.
Como cu Aruba Airport Authority a scoge pa cuminsa un proceso di reorganisacion memey di un pandemia, ta haci e chens di logra exito menos ainda. Abogado di sindicato FTA, mr. Hose Figaroa a bisa hues awe durante tratamento di e caso cu aeropuerto ta purbando pa kita trahadonan cu tin hopi aña di servicio, ganando un bon salario y cu bon beneficionan secundario. Ta hendenan cu lo no haya trabou facil mas na e mesun condicionnan y pio si nan edad ta un poco halto. Cu esey den mente a pidi e magistrado pa no dicta na fabor di aeropuerto, pasobra tratadonan no kier placa, sino nan kier nan trabou.
Ta trata aki di un caso maratonico cu a start for di mainta den sala di corte y a dura te den oranan laat di atardi. Un caso cu 9 trahado di Aruba Airport Authority a entama contra nan doño di trabou, via nan sindicato FTA. Nan no kier perde nan trabou, nan no kier pakete, sino nan djis kier sigui torah.
E caso, como cu ta 11 trahado, a dicidi di parti nan den dos caso, pa asina evita cu e sala ta yena di hende. FTA a representa 9 trahado, mientras cu dos otro trahado a defende nan mes individualmente. E prome caso mester a tuma luga pa 11:00 am, pero finalmente a bin start te cu 12:00 pm. A trata e prome caso cu 5 trahado y den e di dos caso a trata e 4 trahadonan contra Aruba Airport Authority NV. A trata un solo caso general y despues e casonan individual.
Defensa di e trahadonan a solicita di hues pa no bay di acuerdo cu e peticion di aeropuerto pasobra el a logra baha e cantidad di trahadonan caba. Na un principio aeropuerto a menciona di lo kier kita 50 of algo mas cu 50 trahado di trabou. Motibo tabata cu e cantidad di pasaheronan a baha drasticamente door di e pandemia. Pero, entretanto a logra yega na un acuerdo cu 48 trahado caba, cu a acepta e pakete boluntario. E sindicato kier sa dicon ta insisti pa kita e 11 trahadonan aki tambe, si ya a logra reduci e cantidad di trahado casi 100%.
Di otro banda, e sindicato a pidi hues pa no tene mucho duele cu Aruba Airport Authority NV tampoco, pasobra ni cu nan ta perdiendo placa tampoco. E abogado a sigura cu pa e ultimo 16 añanan consecutivo, aeropuerto ta gana riba 10 miyon florin tur aña. Pa bay compara entrada di 2020 cu 2019 ta un hecho di mala fe pasobra aña 2019 tabata e record di aeropuerto, unda a haci ganashi di no menos cu 37 miyon florin! Pues no por ta asina cu despues di 16 aña di gana hopi placa, e prome biaha cu negoshi a cay, ya ta recori na kita hende fo’i trabouo masalmente.
Defensa a splica den corte tambe cu e trahadonan aki, mayoria ta riba 50 aña di edad y tin di nan te hasta 57 aña. A pidi hues pa tene cuenta cu tur di nan, cu e placa cu nan lo cobra di pakete, lo mester purba yega te cu 65 aña pa ora di cobra nan pensioen di biehes. Ta puntra kico ta costa pa aeropuerto wanta nan den servicio ainda, purba un seis luna mas, mira si e cifranan ta drecha, pa despues tuma un decision drastico asina di presenta nan un pakete pa nan bay cas cu ne.
Na final di augustus 2020, gerencia di aeropuerto a anuncia cu ta start un proceso di reorganisacion den cual nan kier baha e cantidad di trahadonan den servicio di e compania. Pa esey nan a traha un plan social, den cual a señala con lo yega na e trahadonan cu mester bay cas cu un pakete. E sindicato FTA desde principio a protesta contra e plan social pasobra e no tabata transparente. Aeropuerto sinembargo no kier a splica kico ta tene cuenta cu ne ora di ofrece pakete y a opta pa no divulga kico ta e rekisitonan pa por scoge un trahado como esun cu lo ofrece un pakete di retiro boluntario.
Di otro banda e sindicato a keha e tempo aya riba e pakete cu Aruba Airport Authority NV a ofrece na su trahadonan. Pues separa cu e forma con ta yega na e candidatonan no ta transparente, a keha cu e pakete mester ta miho.
Abogado mr. Hose Figaroa a splica cu generalmente, separa for di e tempo awo di pandemia, cu e pakete y beneficionan di salario di trahadonan di aeropuerto ta miho cu mayoria den comunidad. Bisando esey, ora kita nan di trabou, no facilmente nan lo haya e mesun salario y cu e mesun beneficionan den otro negoshi. Pero awo cu tin pandemia, e chens pa nan logra mantene nan nivel di bida ta menos ainda. Pio ainda ora nota cu hopi di e trahadonan tin un edad un poco halto, pues mas dificil ainda pa haya un otro trabou.
Di acuerdo cu e abogado, e caso no a trece claridad den tur e incertidumbre cu tabatin durante e proceso di negosacion. Por ehempel no tin claridad riba e rapport con a yega specifico na e trahadonan aki cu mester haya pakete. Ta bisa cu a torah rapport na Hulanda pero nunca a compartie cu e trahadonan ni e sindicato.
Gerencia di aeropuerto a bisa den corte cu sindicato STA si a acepta e pakete, pa cual sindicato FTA ta cuestiona y ta critica. E sindicato mas grandi den sector priva a splica cu e acuerdo cu STA no ta cumpli cu e exigencianan basico. A hasta firma cu AAA sin cu tur e documentonan di e plan social tabata presente. Es mas, STA a acorda cu lo castiga trahadonan cu no acepta e pakete y bay purba nan suerte den corte, locual ta contra ley.
Na final, mester señala si cu e cifranan di cantidad di pasaheronan yegando Aruba ta sigui baha tur luna. De facto, e cifranan aña pasa a resulta pio di locual a pronostica na un principio. Bisando esey, e hecho cu negoshi a cay y consecuentemente e entradanan di aeropuerto a bin abou, no ta un mentira. Cu nan mester ahusta nan operacion tambe ta bisti. Riba e pregunta cu si mester kita 50 trahado, esey ta dificil pa husga sin tin tur informacion y detayenan na man. Hecho ta cu no solamente aeropuerto, sino mayoria compania na Aruba y rond mundo ta reorganisando y adaptando nan mes na e normal nobo.
