A registra un saldo di dos herido diahuebs merdia den careda di 1:30 pm, ora cu dos auto a accidenta fuerte contra di otro na Piedra Plat na altura di Centro Kibrahacha.
Un dama cu un mucha den un Toyota Yaris a para pa pone señal pa bira na man robes yegando cas di algun famia, a hay’e confronta cu un Honda Inspire biniendo for di direccion contrario, cu a bin dal contra dje. El a baha fo’i caminda y pasa dal dos auto cu tabata para dilanti di e cas.
E chauffeur den e Honda a sali reclama. Loke e no a spera ta cu e famia den e cas a sali mes ora na defensa di nan ser keri. Por poco sla a cay. Pero polis a yega na ora pa calma e situacion.
Rapid Responder a bin na e sitio y atende mesora cu e mucha cu a haya algun sla na su cara y tabata sangra for di boca y nanishi.
A controla e chauffeur di e Honda tambe. E dama chauffeur di e Yaris no tabata herida, pero si a haya un susto grandi.
E daño material tabata hopi, mirando cu cuatro auto en total a sufri hopi daño material.