DOW a cuminsa drecha e caminda dilanti waf chikito. Pero e comerciantenan no ta contento cu esaki.
Bea Geerman, comerciante riba waf chikito, ta haya cu esaki no tabata e momento oportuno pa haci esaki. Tabata tin cuater luna unda cu Aruba tabata den lockdown, cu tabata por a hacie ya cu no tabata tin turista.
Awe tabata tin un barco crucero den waf, pero door di e situacion dilanti waf chikito, nan ta prefera di bira bek y bay otro caminda. Toch tin varios turista cu ta Sali for di e areanan di hotel, pa bin den Playa pa haci nan compras. Pero nan no ta haya luga pa para nan auto. Personanan cu ta traha den Playa ta haci uzo di e luganan di parkeer pa cual no ta resta luga pa turista para nan auto. E turista no ta keda core rond buscando luga pa para y tampoco nan no ta bay para leu.
Poco poco Aruba ta recuperando, e turistanan a cuminsa bin Aruba bek. Actualmente mundo ta pasando den e di tres ola di Coronavirus y Aruba no ta un excepcion. Aruba lo no sobrevivi un di dos lockdown. Ya caba den e di prome lockdown, nan como comerciante a pasa den duro.
Por ultimo, Bea Geerman a pidi tur hende pa cuida nan curpa. Gobierno mester tuma medida, no di cera comercio, pero di pone man duro riba esunnan cu ta bay di pachanga y despues ta trece virus cas. Comerciantenan ta paga impuesto y no ta husto cu ta nan mester bay paga e consecuencia di esunnan cu no ta paga impuesto.
Evelyn Boyé, comerciante tambe riba waf chikito. E ta contento, di un banda pasobra cu e caminda ey mester un drecha. Pero e ta malcontento pasobra ta hacie net na momento cu turismo a lanta. Precisamente riba diahuebs cu tin turista aden, ya cu tin un barco crucero tambe den waf.
Mas aleu, Boyé a sigui bisa cu door di e situacion e turistanan no ta bin na waf chikito. Si tabata sa cu drechamento di waf chikito ta riba planning, mester a hacie na momento cu Aruba tabata den lockdown y no awo cu turismo a cuminsa lanta cabes.
Den e dianan aki, Boyé a bisa cu e tin varios dia cu su benta ta hopi bon y danki na turismo di hotel. Tin crucero pero no cu e turistanan ta echt cumpra. E ta haci apelacion na un y tur pa cuida curpa. Aruba no por permiti su mes di bay den un lockdown, ya cu “esey lo ta funesto pa nos tur”.
