Diabierna anochi alrededor di 11:05pm a sosode un accidente serio na altura di e entrada di e caminda pa bay Yara na Savaneta. Dos auto a dal frontal den otro, lagando 2 chauffeur y 4 pasahero parti den e dos autonan herida atras na e sitio. Varios ambulance a bay na e sitio pa brinda asistencia, mientras Polisnan mester a desvia trafico for di varios crusada.
Trafico tabata basta pisa riba e diabierna anochi aki. E impacto tabata fuerte, cu consecuencia cu un di e victimanan, un señora di edad avansa, a bay Hospital den un situacion serio.
Tur cos ta mustra cu un auto RHD a bay lora na man robes pa bira drenta e caminda di Yara ma Savaneta, sin duna preferencia na trafico contrario biniendo for di San Nicolas.
Polis di trafico awor ta investigando e accidente serio aki. Ta corda automobilistanan pa tene extra cautela den e dianan druk aki di carnaval.