Diahuebs atardi a tuma luga den sala di Corte di Prome Instancia, e pleidooi na defensa di e acusado Franklin Abath, como parti di e tratamento di caso Avestruz. E abogado di Abath, ta mr. Gregory Maldonado a hiba palabra durante aproximadamente un ora y mei, dirigiendo su mes na Hues mr. De Doelder.
Segun mr. Maldonado, for di e dossier y e rekisitorio no por saca afo ta na beneficio di ken supuestamente Franklin Abath of Sevinger lo a comete fraude contra Pais Aruba. Tur e pasonan tuma tabata forma parti di e maneho regular di DIP; y te hasta e grandura di e tereno ta uno predetermina door di e verkaveling cu Kadaster ta haci y no algo cu Abath lo por a fiha riba su su kier.
Ta kere cu ministerio publico a involucr’e den e investigacion simplemente pasobra e tabata formma parti di e Management Team di DIP, mientras cu e mes no tabatin autoridad pa otorga tereno, pero solamente transmiti e conseho di e departamento pa e minister. Adicionalmente, no por a prueba cu el a enrikece su mes, ni participa den un fraude, pa cual a pidi hues pa declara e demanda di fiscal no admisibel.
Por ultimo, hues ta duna opoortunidad na e acusado mes, esta Abath, pa hiba palabra. Abath a comparti cu e ultimo lunanan tabata hopi doloroso pa e y su famia; di wak su bon nomber wordo lastra net prome cu e final di su carera y el a conclui ratificando su posicion di ta inocente di loke ta acus’e.
E parti aki di e proceso ta uno cu a bin ta tumando luga henter siman na un manera programa segun cada sospecho di e caso y riba diahuebs tabata turno di Harms y Biemans mainta y Abath parti atardi.
Pa e relato completo, lesa edicion di TREMPAN
