Edwina Henriquez, Abogado di Derechonan Humano y Democratisacion den un carta fuertisimo manda pa prome minister di Hulanda Mark Rutte y Conseho di Minister di Reino ta haci un denuncia serio contra Minister Otmar Oduber. E ta papia cu e mandatario ta bou influencia externo cu ta atacha Aruba pa cual e ta pidi intervencion pa pone e isla bou di Curatela. Tur esaki relaciona cu e ordo pa pone un paro na propagandanan di EcoTech / EcoGas na TeleAruba.
Den e carta fecha 14 di october e ciudadano aki kende a bin ta atacando Gobierno fuertemente relaciona cu e proceso pa cumpra un incinerator, ta cuminsa pa splica un hecho condenabel cu a tuma luga diahuebs ultimo.
Riba e dia en cuestion gerencia di e empresanan ariba menciona a haya informe di TeleAruba, cu ta bou presidencia di prome minister Evelyn Wever Croes, cu a duna ordo pa censura e video di e companianan cu a wordo transmiti un dia prome.
Loading…
Reload document 
Open in new tab “E splicacion ta cu e contenido di e material informativo ta ofensivo.” Henriquez den su carta ta splica cu e persona den e video, den un forma trankil, ta splica of desbarata informacionnan robes duna door di Minister Oduber den e reunion di e ley di sushi den Parlamento dia 2 di october ultimo.
“E decision dictadorial di Conseho di Minister di Aruba pa censura e video di EcoTech / Ecogas, cu ta un decision aparentemente tuma bou presion di Minister Otmar Oduber, a causa shock den comunidad,” por lesa den e carta. Mi a wordo acerca door di diferente persona pa tuma accion, pero mi tabata kier a investiga e asunto aki mi mes prome, pa confirma cu loke a bisami ta berdad.” Y el a confirma cu berdad ordo a yega for di Conseho di Minister di Aruba.
E denuncia cu e ciudadano aki ta haci ta sigui pa splicacion di su experencia cu propagandanan di EcoTech / EcoGas cu el a bin ta siguiendo den medionan y riba rednan social cu mas bien ta “videonan informativo di calidad halto y aclariando hopi informacion di maneho di desperdicio na e publico en general. Esaki “contrario na Gobierno di Aruba cu ta nenga pertinentemente di informa pueblo di Aruba riba e consecuencianan di cambio den e ley di Serlimar.”
Pero tambe e ta haci un acusacion serio cu tur e decision aki ta bini riba presion di Minister Otmar Oduber, kende e ta kere di tin un interes personal pa prohibi e companianan di coregi informacion robes cu e ta duna na pueblo. “Aparentemente Gobierno ta haya ta pisa mas e interes di Minister Oduber pa keda persisti den su mentiranan contra e interes di pueblo di Aruba pa haya informacion corecto via di e videonan di EcoTech y EcoGas.”
Tur esaki ta motibo cu Edwina Henriquez ta bisa cu e decision di Gobierno di Aruba ta uno dictatorial y mal interpretacion di e derecho poni den articulo 1.12. Censurando un propaganda asina, e ta bisa den su carta, ta kita derecho di pueblo pa haya informacion debido. “Gobierno di prome minister Wever Croes ta decidido pa duna minister Otmar Oduber su gusto, pa miedo cu Oduber di otro forma lo laga e Gobierno cay. Di otro banda, Minister Otmar Oduber tin pura pa di un forma menos bon pasa e ley di Waste to Energy bou di e capa di Ley di Serlimar adapta den Parlamento. “Minister Otmar Oduber aparentemente ta bou di presion di su partner Venezolano den e proyecto di Waste to Energy / sponser campaña.” Hasta prome minister, e ta bisa, ta presiona parlamentarionan pa vota na fabor di e ley adapta. “Na Aruba nos a cay den un dictadura.”
Den e ultimo parti di su carta e ta papia d e lucha di habitantenan di Parkietenbos y nan preocupacion pa e instalacion di un incinerator, y cu nan a manda dos carta caba pa prome minister sin haya reaccion.
Su conclusion ta cu debi na e situacion aki, e ta haci un peticion, a base di articulo 43 inciso 2 di Constitucion, pa pone Aruba bou curatela. Esaki basa riba e hecho cu Minister Otmar Oduber aparentemente ta bou di presion di forsanan stranherio pa aki na Aruba tuma cierto decisionnan y cu Minister Otmar Oduber ta forsa Conseho di Minister di Aruba pa tuma decisionnan, cu ta bay en contra di derechonan fundamental di ciudadanonan di Aruba, pa cual e democracia di Aruba ta wordo mina.
