Den e crisis cu Aruba ta pasando aden, miles y miles di persona a perde trabou. Tin inversionista simplemente no por mantene na negoshi habri y tin otro cu por haci uzo di e sistema di subsidio di salario pero ta prefera di manda hende cas cu e ordo pa haci uzo di FASE. Esaki ta e caso cu a tuma luga cu un compania cu ta opera na aeropuerto y dos di su empleadonan a dicidi di bay Corte.
Mr. Zuhaila Arendsz Marchena a confirma cu e tin un caso den Corte di cual no tin un decision ainda. Esaki tabata un caso unda cu e doño di trabou tabata sinti cu e no por carga e gastonan di trahadonan mas y a opta pa manda nan pa bay cobra FASE en bes di haci uzo di e programa di subsidio di salario.
Arendsz Marchena tabatin dos cliente, kendenan a dicidi pa bay Corte “y mi tin cu bisa cu e caso a bay hopi bon pa nos clientenan”. A trece puntonan valido dilanti. E ta splica cu den casonan asina Corte ta bay evalua si e doño di trabou tabatin suficiente motibo pa ofrece su trahado pa trece cambio den su contracto laboral y si e cambionan propone ta rasonabel.
Na Aruba e leynan laboral ta diferente. Asina por ehempel un doño di trabou no por cambia un acuerdo laboral riba su mes. E mester di autorisacion di e trahado, pues e mester bay di mutuo acuerdo. Niun doño di trabou por yega y bisa un trahado cu e no mester di dje mas, y cu e por bay cas.
Den e caso aki, e doño di trabou a bisa cu e no por carga e gastonan na momento cu e paga via di subsidio di salario, cu ta encera e diferente tipo di primanan.
Corte mester dicidi si e oferta di doño di trabou ta rasonabel y e trahado ta obliga pa acepta; y si e oferta no tabata rasonabel e empleado no ta obliga pa acepta e oferta. E doño di trabou den e caso aki su oferta tabata pa e empleadonan bay haci uzo di FASE.
E caso ta programa pa un decision dia 14 di october. Tin mas caso similar, di otro companianan cu tambe ta pendiente pa un decision. E ta un situacion basta comun bou di e circunstancianan actual cu Aruba ta pasando aden.
Extra-oficialmente por a compronde cu e compania na aeropuerto a dicidi di tuma su empleadonan bek na servicio, pero e Abogado mes no ta na altura di esaki y te ainda tin veredicto poni pa dia 14 di october.
HUUR
Coronavirus a trece hopi cambio cu ne. Por ehempel den caso di huurnan, Corte ta dicidi kende ta bay carga e riesgo y con hopi. Tur cos ta depende di e circunstancianan existente. “En general contractonan ta bou di lupa pa mira con ta bay reparti e riesgonan. E ta conta pa contracto di huur, trabou, benta, etc,” e Abogado a splica.
