Prome Minister Evelyn Wever-Croes hunto cu Minister Dangui Oduber y e ekipo di Crisis, dialuna tawata den Parlamento pa duna un opdate riba maneho di Gobierno pa loke ta trata desaroyo di Covid-19 na Aruba. Desde luna pasa pa awor por a nota un desaroyo positivo ta manifestando.
Esaki ta danki na e disciplina cu mayoria den comunidad a demostra y e ta danki pa e ekipo profesional cu nos tin como frontliners, especialmente riba tereno di cuido y den mantene orden publico, y ta danki pa e tremendo ekipo di crisis team cu Aruba ta dispone di dje.
Na comienso di september tawata tin 1200 caso activo, pa medio september, el a bira 1600, y fin di september nos ta na 800 caso. Gobierno hunto cu e ekipo di maneho di Corono virus a bin cu mas medida. Medidanan mas specifico y mas estricto, por ehempel; toque de queda mas trempan, uzo obligatorio di tapaboca den tur establecimento y oficina.
“No ta tur medida tabata facil, especialmente no riba nivel individual pa tur negoshi, pero si necesario den interes general, y awe nos por mira e resultadonan positivo, cu e cantidad di caso activ a baha di 1600 pa 800 den apenas dos pa tres siman”, Prome Minister a duna di conoce.
Tambe a haci e controlnan di cuarentena y isolacion mucho mas estricto. A pidi tur hefe di departamento den gobierno pa yuda den esaki, y asigna algun di nan trahadonan, y algun auto di servicio – dienstwagens – pa e taskforce di cuarentena y isolacion wordo amplia sin mester busca personal pafo di gobierno y sin mester lease mas auto. Esnan den isolacion y cuarentena ta haya mas control y mas atencion individual y asina awe nos por mira e resultado positivo, cu e cantidad di caso activo a baha di 1600 pa 800.
“Tur esaki un biaha mas no tabata posibel sin e cooperacion y disciplina di nos comunidad. Tin algun hende cu no ta realisa e seriedad di e crisis aki, pero e gran gran mayoria di nos ciudadanonan si ta realisa esaki, y pa esaki mi kier gradici tur esnan cu ta demostra disciplina.
Tambe mi kier gradici, den number di Gobierno di Aruba tur esnan cu ta trahando pa yuda nos combati e virus. Esnan den sector di Cuido, DVG, DBZ, HOH, laboratorionan, dokternan di cas, especialmente specialistanan y personal di ICU. Tambe esnan cu ta trahando den e taskforcenan cu ta controla esnan den isolacion, den cuarentena, y companianan pa cu cumplimento.
Tambe esnan cu ta traha den mantene orden publico, cuerpo policial, cu ta enfrenta retonan durante toque de queda, durante fin di siman riba nos beachnan, aparte di mester atende cu nan trabou diario, cu tambe ta yen di reto. No ta e pais mas poderoso of rico ta esun cu lo vence e Corona virus, pero e pais mas disciplina. Danki pa bo disciplina awe nos ta mira cu e cantidad di caso activo a baha di 1600 pa 800 den apenas dos pa tres siman”, Prome Minister a termina bisando.
