For di Colombia a regresa 120 Arubiano riba e vuelo di Copa Airlines, kendenan tabata pega desde cu e frontera ta cera pa motibo di Coronavirus. E vuelo a pasa pickup e 120 personanan den 5 ciudad di Colombia, di cual Barranquilla tabata ultimo y di eynan a bin direccion Aruba. E avion a regresa Colombia sin persona abordo, mirando cu e gobierno Colombiano tin e frontera cera y no ta laga niun Colombiano regresa.
Mita di e vuelo tabata consisti di pashentnan y nan acompañante di AZV, mientras e otro mita tabata personanan cu pa un motibo of otro a keda pega na Colombia. E Crisis Team a zorg pa organisa e vuelo aki, di cual Gobierno a duna autorisacion p’e vuelo por a yega Aruba cu e grupo aki.
Pa 4 siman largo nan tabata bezig cu e hendenan aki, kendenan tabata puntra con nan por regresa Aruba. AZV a percura p’e ticketnan di nan pashent y acompañantenan, mientras cu e otro personanan mes a percura pa paga nan mesun ticket.
Tur persona cu a yega den e vuelo for di Colombia, tin cu sigui e protocol. Nan lo mester bay den cuarentena pa mira si nan lo of no lo desaroya sintomanan di Coronavirus. Pa haya mas informacion over con pa regresa Aruba por manda un email na [email protected].