Ta hopi importante pa pueblo sa kico ta pasando cu nos hospital. A topa cu dokter- y specialistanan, y den combersacion cu nan, nan ta comenta di ta poco preocupa cu un biaha mas falta material den Hospital.
Hopi biaha cierto ekiponan no ta traha of mester wordo reemplasa. Sinembargo esaki no ta wordo haci na tempo etc. Esey ta causa cu e ta bin cu su problemanan tambe pa e cuido cu mester wordo duna na hospital.
Por ehempel na e momentonan aki, a haya informacion for di specialistanan, cu mester stop operacion di mucha.
Dicon
Pasobra e stock di filter pa anestesia pa mucha a caba. No tin. A warda un cantidad hopi chikito cu ta solamente disponibel pa un emergencia cu por presenta na momento cu algo sosode cu un mucha y cu nan mester oper’e urgentemente.
Pero tur loke ta riba agenda, riba schedule, etc. pa tuma luga, esta operacionnan di mucha, a wordo poni on hold. Ta e propio specialistanan a pone nos na altura. Aunke kisas pronto hospital por sali bisa cu no tin peliger, of cu no ta berdad, tin cu enfatisa cu ta e specialistanan mes a confirma cu nan operacionnan riba mucha a wordo para, pa motibo cu no tin filter pa anestesia.
Esnan cu ta responsabel mester percura pa e stock di tur loke ta e materialnan necesario pa Dr. Horario Oduber Hospital.
Shap den mi shap
A tende tambe, for di e otro directornan anterior, cu tabata tin cierto “shap den mi shap”.
Cierto directornan cu awe no tey mas, tabata haci negoshi caba riba nan mes cu un negoshi apart, pa nan tambe gana placa den banda. Tur e cosnan aki ta bin cu su consecuencianan pa dr. Horacio Oduber Hospital.
Operacionnan cu ta riba schedule pa tuma luga, mester cancela, pasobra no tin e filter di anestesia pa opera un mucha.
Mescos ta pasa cu ekiponan cu tambe tin biaha ta outdated, mester a cambianan hopi tempo caba. Pero ta keda rek e temporada cu tur consecuencia cu e por tin pa e cuido medico di nos pueblo aki na Aruba.
Ta spera cu mas lihe posibel e stock yega y no solamente e stock di filter, pero demas stocknan tambe. Y asina cuido medico na Dr. Horacio Oduber Hospital, por cana smooth sin ningun problema of consecuencia pa ningun otro pashent.
