Centro di Control di Cacho tin casi un aña den operacion bou guia di veterinario Irene Croes. Un centro cu apesar di e nomber, ta haya nan mes ta atende cu pushanan bandona tambe. Cifranan di 2020 ta mustra toch ainda ta bandona bestianan di cas, apesar cu e cifra compara cu otro añanan a conoce reduccion.
For di momento cu a habri e centro dia prome di juli 2020, ciudadanonan no por simplemente tira nan bestianan na e centro, pero mester firma un buki di registro riba e motibo pakico ta deshaci di nan cacho of nan pushi.
Pa loke ta e pushinan entrega eynan, por corda cu a logra rescata rond di 25 pushi cu a haya cas pa nan keda. Di otro banda, mester a pone mas cu 200 pushi drumi, cual por a evita si cada doño a percura pa sterilisa nan pushi, e veterinario Irene Croes a conta.
Den nan registro ta para cu den e seis luna di operacion a trece 228 cacho, di cual 47% mester a pone drumi y e resto di 53% a haya un hogar nobo. Tin di nan ta adopta localmente of otro a bay pa un fundacion cu ta busca cas pa nan, sea na Aruba of den exterior. E centro kier traha pa sigui conscientisa ciudadanonan pa cuida nan bestianan y evita cu ta dump e cachonan, principalmente den mondi y laga nan pa nan cuenta. “Esaki ta un trend awo,” Croes a bisa. El a agrega cu nan ta concentra hopi riba adopcion y sterilisacion.
E veterinario ta sinti cu compara cu antes, e cifra ta menos. E por bisa esaki pasobra ta corda cu un biaha a papia cu a pone 6 mil cacho drumi. Pa seis luna e cifra ta mustra abou, pero e ta puntra kico a pasa cu e otronan di prome cu juli, 2020. Si ta bestianan cu a dump den mondi of no.
Sterilisacion ta un proceso masha facil. Fundacion Stimami, Sterilisami ta sigui cu nan campaña. E ta importante pasobra hopi hende ainda no kier sterilisa nan mascota.
Aruba tin un ley cu no por laga cachonan riba caya. Den cuadro di esaki, Croes a informa cu gobierno tin intencion di introduci un Unidad di Control di Cacho cu ta consisti di diferente departamento (manera City Inspector, Polis, Brandweer, etc), cu lo yuda piki cacho riba caya y hiba nan pa CCC. Na e centro ta screen e cacho pa wak si nan tin doño. Si nan ta brabo of malo, lo pone nan drumi.
E centro a haya diferente vehiculo na nan disposicion pa haci e trabou di evita cachonan riba caya.
