Ex minister di Infrastructura y actual sospechoso di husticia, Otmar Oduber, ta den corte mañan 8:30am den un caso civil contra Aruba Bank. E banco a nenga di habri un cuenta comercial pa e ex-mandatario y awendia comerciante. Abogado mr. Allan Kuster ta defende Otmar Oduber y BCY Entertainment VBA – Bochincha Container Yard, mientras cu ex-hues, esta abogado mr. Theresa Fernandes-Pedra lo defende e interesnan di Aruba Bank.
Dia 10 di juli 2020 a lanta e compania situa na e skina di Paardenbaaistraat y Rockefellerstraat sin number. Desde e dia ey Otmar Oduber mes ta director cu tur autoridad. Meta di e compania ta pa opera un parke di container, bou cua ta compronde maneha, opera, pone na disposicion y huur espacio pa pone container destina pa entre otro restaurant, food courts, benta di ijscream, snackbar, coctail lounge, como tambe espacio habri pa musica, bailamento y organisa eventonan cultural. Tambe nan por cera contract cu cantante y bandanan musical pa haci presentacion eynan.
Locual ta intesante den e caso di mañan ta e hecho cu banco a cera porta pa e negoshi. Esey ta lanta e pregunta: Ta cu ki placa a habri e negoshi y inverti den e containernan anto? Si no a fia placa di ningun banco local, ta ken a financia e proyecto sin pasa un banco local? Esey ta locual e banco awor ta cuestiona of pasobra e director di e compania ta un sospechoso di husticia, acusa entre otro di labamento di placa?
Clientenan ta raporta cu e negoshi ta draai normal y ora swipe cu carchi di debito, e recibo no ta sali cu nomber di Bochincha sino cu nomber di un club nocturno situa ma W-Aviation, pues na aeropuerto priva. Asina toch e comerciante ta logra “by pass” e reglanan di banco y sigui cobra bou di un compania cu no ta operacional mas.
E concepto di Bochincha ta procedente di Colombia y a funciona eynan cu gran exito. Ta obvio cu aki na Aruba tambe tin un mercado pa e tipo di negoshinan asina, pero banco no ta mira e concepto di e negoshi, sino mas bien e riesgo pa atende cu un sospechoso di husticia cu cualkier dia por cambia di status di libertad pa encarcela.
No ta conoci si ta e cuenta di banco di e compania nobo aki so a nenga, of si banconan a cera otro cuentanan tambe di companianan sea liga directamente of indirectamente bou di Otmar Oduber.
