Un rato pasa a bati alarma pa un homber herida na un chollerhouse den Elleboogstraat den Playa. Polisnan a topa cu e victima cerca di Kowloon Restaurant. E tabatin varios corta na su curpa y tabata sangra hopi. A pidi presencia di ambulance mesora pa brinda asistencia. A detene e sospechoso Lencho Wever un rato despues, sinta ta huma su base den Chollerhouse.
E victima a conta Polisnan cu e tin dos dia na Aruba y cu nan a horta su placa y pertenencianan, incluyendo su maleta den e chollerhouse, unda antes tabata un gym situa den Elleboogstraat. A duna Polis descripcion di e posibel agresor, pasobra parce cu ora el a bay reclama su maleta, a start un pelea. Den e proceso, a pas’e dor di un glas na e di dos piso di e edificio. Consecuentemente el a sufri bastante corta na diferente parti di su curpa.
Mientras algun Polis a keda warda yegada di ambulance, e otronan a bay na e Chollerhouse. Ey a topa cu Lencho Wever hunto cu Nathalie y Chico Gang humando base. A interoga nan y asina a haya sa kico exactamente a sosode. Nan a bisa Polis cu e turista a yega cu e rumannan morocho conoi awendia como “Glacial”, pero nan a keda warda pafo. E Colombiano a drenta y reclama su maleta. Nan a lag’e cana den henter e luga pa mira cu no tin nada.
Lencho Wever a conta Polis cu e turista a purba hink’e. Chico Gang y Nathalie a purba interveni pa evita cu ta hinca Wever cu un screwdriver. Y ta den e proceso aki Lencho Wever a saca un machete for di tras di su lomba. Na e momento ey e turista a core subi trapi pa purba scapa. Nan a bisa cu ta su so a subi bay ariba y diripiente a scucha un zonido duro y a mir’e cay abou for di dos piso. Bisando esey, e testigonan ta insisti cu ningun hende a bay su tras y ta su so cu su so a cay.
Aunke Polis a scucha e declaracionnan aki, asina mes a opta pa detene Lencho Wever pa hib’e Warda di Polis pa mas interogacion. E ta para riba cu e no a maltrata e turista y cu nan no tabatin ningun maleta eyden. E turista aki ta un simpel uzado di droga y den su haltura a purba bringa.
