Siman pasa Conseho di Minister a dicidi di nombra Judelca Briceño den “Management Team” di Directie Volksgezondheid Aruba (DVG). E ta drenta debi na salida di abogado mr. Sven Faarup for di dicho ekipo di maneho. Na juni aña pasa a instala e “Management Team” despues di prohibi entrada di e Director, drs. Jerry Staring. E ultimo aki keto bay ta “na disposicion” di Minister di Salud Publico pero no por asumi su funcion bek.
Minister Oduber a bisa cu a laga haci un evaluacion di su funcionamento pero e no a sali bon pe. Asina mes no a tuma un decision fiho ainda. Entretanto e departamento ta conta cu un maneho temporario, awor forma pa Judelca Briceño y Joan van Heyningen, un Jeugd Arts, hefe suplente di Jeugd Gezondheid Zorg (JGZ) na DVG.
Judelca Briceño a studia na Colegio Arubano y despues a sigui studia na Universiteit van Utrecht na Hulanda, unda el a studia psicologia. El a termina su estudio como psicologo den asuntonan di trabou, di salud y di organisacion. Bek na Aruba el a traha como “Sociaal Economisch Beleidsmedewerker” na Directie Arbeid & Onderzoek. Di eynan el a bay traha como “Human Resources Manager” (HR Manager) na Stichting Algemeen Pensioenfonds Aruba. Y despues di formacion di e Gobierno nobo, el a bira consehero di Minister Dangui Oduber.
DVG ta net den un era nobo, cu cambio di cultura y introduccion di un vision y mision cu tur empleado ta reconoce y ta dispuesto pa ehecuta. Ta varios cambio y progreso tabatin den e ultimo añanan caba. Documentonan oficial den archivo di Gobierno di Aruba ta mustra cu for di aña 1917 tin un movemento riba un departamento pa maneha asuntonan di salud publico na Aruba, pues DVG of DESPA a celebra 100 aña di existencia dos aña pasa! Na 1917 a trece un curpa morto for di Corsou pa Aruba y asina a realisa cu mester di un maneho con ta atende cu situacionnan asina. Ta di eynan a crea un “Kinderarts Besluit” pa vacuna muchanan y tambe a nace e “Higienische Dienst” den unda a cuminsa educa comunidad riba labamento di man y cuminsa introduci reglanan pa negoshinan cu tabata bende alimento.
Pa straño cu por zona, e departamento a funciona pa casi 100 aña sin un “instelling besluit”. Comosifuera poco, nunca a traha un “formatieplan” tampoco, den unda ta stipula y ta discribi cada 1 di e 82 funcionnan den e departamento. Tampoco den e casi 100 añanan no a prepara nunca un “Personeelhandboek” den unda ta stipula e reglanan cu trahadonan mester tene nan mes na dje, ni un “Verzuim Reglement”, “Ziekteverzuim Beleid”, “Visiedocument” of tampoco un “Strategisch Plan”. Bisando esaki, ta hopi trabou, hopi investigacion, deliberacion, dialogo y inversion di tempo a bay den preparacion di tur e rapportnan, maneho y vision pa DVG.
Cu e era nobo den Directie Volksgezondheid Aruba, a haci posibel pa cambia e cultura di un “Uitvoerende Dienst” pa un “Beleids Directie”. DVG tin como meta pa fungi como e parti central den cuido na Aruba, conectando tur otro stakeholdernan. E departamento ta demostra profesionalismo, dinamismo y etica halto den tur trabou cu nan ta desplega.
Directie Volksgezondheid ta situa den Caya Ing. Roland Lacle, parti den 6 edificio banda di otro y 2 otro edificio situa na Barcadera, unda tin Servicio Veterinario y GKMB. Na tur e departamento ta conta cu 160 empleado bon prepara y capaz pa sigui desaroya e organisacion pa implementa y ehecuta maneho riba tereno di salud publico na nos isla.
