Minister Rudy Lampe, encarga cu Enseñansa, ta informa fundacionnan den un carta cu mester hala faha mara pasobra Gobierno di Reino y CAFT ta riba nan lomba. Ta trata aki di un carta manda pa tur directiva di scolnan publico , Dienst Inspectie van het Onderwijs y Directie Onderwijs.
Den e carta e mandatario ta bisa cu e ta pidi nan atencion pa un tema specifico cu tin di haber cu finanza. Gobierno di Reino y CAFT a confronta Aruba un biaha mas cu e realidad di e disciplina presupuestario. Pa tal motibo e ta bay optimalisa e maneho di subsidio. “Esaki no por tuma luga sin e participacion di e directivanan di scol, Dienst Publieke Scholen, Directie Onderwijs y Dienst Inspectie Onderwijs.” E ta splica cu e intencion ta pa hinca e maneho nobo di subsidio den un handboek. “Adelantando esaki y mirando e limitacionnan presupuestario di pais Aruba ta i gran urgencia opa tuma medidanan for di awor caba pa controla e gastonan di personal y subsidio pa personal.”
Pa e motibo ariba menciona, el a informa nan di algun medida cu e ta introduci inmediatamente. E ta corda cu e cantidad di docentenan ta wordo subsidia pa klasnan di 28 mucha den enseñansa regular y avanza, y klasnan di 24 mucha den kleuter regular. Oranan apart, cu docente cu no ta full time, por ta maximalmente 1/8 parti di uno di tempo completo. Overtime no ta permiti mas ni pa docente ni personal di apoyo. Esaki mester pone un paro na dje di inmediato. Overtime no ta presupuesta y por lo tanto ta aparece como gasto di mas riba presupuesto di pais Aruba. Y gasto di mas no ta permiti.
Tambe dianan di vakantie cu no a wordo tuma pa motibo cu tabata malo, tambe ta pone un stop na dje.
Na final e ta pidi cooperacion di tur instancia concerni pa cumpli cu e decision aki.
