Diabierna un poco despues di 2.30 di merdia ta bati alarma grandi pa un avion di JetBlue yegando Aruba cu a confronta problema.
Tabata trata di un JB airbus 320 cu tabata bin di Fort Lauerdale. Segun calculo, un ocho (8) minuut despues e avion a baha sin problema y a keda staciona unda e avionnan ta taxi. Eynan personal di Cuerpo di Bombero a yega cerca pa inspecciona cu tur cos ta bon cu e nave pa e sigui move direccion di e terminal.
Otro autoridadnan tambe a inspecciona e pista prome cu por a permiti American Airlines lanta buelo y pa United su vuelo baha. No tabatin ningun problema cu e pista y e operacion di aeropuerto por a sigui normalmente.
Extra-oficialmente por a compronde cu tabatin un problema na e motor banda robez, sea un leak of un desperfecto pa cual e Piloto a dicidi di bati alarma. Esaki a sosode ora cu tabata yegando Aruba caba.
No tabatin persona herida, pero si tabatin algun cu a haya un susto ora cu nan a bati alarma. Mey ora despues cu a bati alarma, a habri pista bek.
