Diadomingo madruga den careda di 12.30 polis a presenta cu urgencia den Vondellaan pa un auto cu lo a dal den palo di luz.
Akinan a bin topa cu un Suzuki Alto cu basta daño material, para riba un pida tereno habri dilanti Colegio Arubano. Na yegada no a topa cu e chauffeur na sitio.
Testigonan a conta di a mira un dama baha for di e auto y bay sinta na banda di caminda tur desorienta. Dado momento amistadnan a presenta den otro auto y a cuminsa cuestiona e chauffeur y puntra si e tabata burachi/ halto?
Nan a subi’e den nan auto y bandona sitio di accidente. Locual cu por a saca afo na sitio ta indica cu muy probablemente e persona na stuur lo a haya sla na cabes, mirando e impacto contra e windshield.
Den un intento aparentemente pa burla di authoridad, nan a kita e number di e auto, pero a lubida e tas di e chauffeur cu tur su pertenencia aden. Tambe a haya boter di cerbes den e auto.
Un otro patruya a dirigi su mes pa hospital, por si acaso e chauffeur presenta pa busca atencion medico. Takelwagen a presenta y transport e vehiculo pa asina continua cu e investigacion.
