Diasabra a marca un aña cu Aruba a conoce su prome 2 casonan di COVID-19. Aruba a bira parti di e pandemia mundial y bida di tur hende a cambia. Esaki tawata e aña mas duro den historia di pais Aruba. Un aña dificil, cu hopi stress pa un y tur, cu hopi tension y incertidumbre.
“Nos tur a sinti e efectonan y Covid-19 a causa hopi destruccion den tur sentido di palabra. P’esey gobierno a conmemora e fecha di 13 di maart 2021 pa trece un reflexion riba tur locual pais Aruba a pasa aden,” asina Minister di Turismo, Salubridad Publico y Deporte Dangui Oduber a trece dilanti.
Den oranan di atardi prome minister mr. Evelyn Wever Croes compaña pa tur otro minister y y miembronan di parlamento a cana yega te na e waf dilanti Bestuurskantoor. Eynan pa honra esnan cu a perde nan bida den e bataya contra COVID, a tira un flor blanco den lama.
Tambe e mandatario a repasa e situacion cu a pasa aden, medidanan tuma y con e situacion ta awendia. Asina por ehempel a haci 112 mil test na Aruba, di cual 35% ta di e poblacion y e resto di turistanan na nan yegada. Di e cifra aki 8376 persona a test positivo di cual 93% ta residente. COVID-19 directamente of indirectamente a causa 78 morto.
Minister Dangui Oduber riba e dia aki a manda e siguiente mensahe tambe. “Mi kier a gradici di curason tur esnan cu ta traha den cuido. Danki na boso esfuerso y compromiso pa brinda un excelente cuido y servicio na pashentnan. Danki na tur frontliners cu tatwata na trabou percurando pa Aruba por keda draai, na miembronan di crisis team, departamento di salud publico (DBZ- team brond- contacten onderzoek, team isolatie en quaraintaine- taskforce bedrijven- team vacuna) y specialmente na comunidad pa e comprension y disciplina demostra den e un aña aki.”
