Polis a activa awe tardi pa 6:15pm ora cu bisiñanan a yama pa un problema cu a bay fo’i man den Emmastraat. Un problema a escala ora cu un homber a yega hinca un otro cu un sker, mientras cu a dal su auto cu un klinker. Consecuentemente a kibra e glas di bentana patras di e auto marca Chevrolet mientras cu a deuk un parti di e vehiculo.
Polis a yega mesora y a constata cu berdad tabatin un persona herida na e sitio, pa cual a solicita presencia mesora di ambulance pa brinda asistencia na e victima. E homber tabatin un hinca na su man. El a reconoce e sospechoso, di nacionalidad Dominicano y cu ta biba eybanda mes.
Parce cu e hoben cu a agredi e homber y dal su auto cu klinker kier a huy for di e sitio. Pero e no a logra den su intento, pasobra polis a yega mesora y a detene patras di su cas. Su mama y ruman chikito tabata yora masha na momento di e detencion. Polis awor lo mester investiga e motibo di e maltrato y presenta e caso na Ministerio Publico pa fiscal dicidi riba persecucion.
