Tur siman laboratorio di hospital ta manda un cierto cantidad di testnan positivo di Covid-19 pa analisa na Hulanda. Di lotenan cu a manda, e total di variantenan di precupacion (VOC) identifica te awor ta; 114 caso di Reino Uni, 2 di Sur Africa y 3 di Brazil. Pa loke ta total di e variantenan di interes (VOI) e cantidad di Mexico ta 8 y di California a bira 8.
Un mensahe ta bay na henter comunidad pa limita salimento no necesario, sea extra cauteloso y sigui cumpli firmemente cu tur medida y reglanan di distanciamento social, uzo di tapaboca y laba man frecuentemente. Tambe, haci uzo di e oportunidad pa registra pa vacuna. Corda bon cu no ta permiti actividad social na cas.
E variantenan aki ta mas agresivo y contagioso y por causa problemanan serio di salud y compromete e capacidad di cuido na nos Hospital. Na momento cu bo sinti sintoma, isola bo mes y yama bo dokter di cas pa por haci test. No keda move rond wardando resultado, keda cas y evita di sigui plama e virus. Solamente uni cu disciplina y solidaridad, lo por reduci e plamamento di e virus y sigui move den direccion di recuperacion y progreso pa Aruba.
