Awe tardi Cuerpo Policial Aruba a confirma cu nan a detene e hoben Miguel J. D. Gomez, naci dia 4 di maart 1999 (21 aña) awe den Maria van Oranjestraat. Alabes a coy su auto, un Nissan March color shinishi, den beslag como parti di e investigacion penal den su contra.
Ta sospecha cu e t’esun cu a los tiro ayera nochi riba un homber na altura di Brazil # 125. Ey polis a topa un homber na suela band’i su auto cu perforacion di bala den barica. El a bisa e defensornan di ley cu Miguel a tir’e, a duna nan e modelo y e number di auto den cual el a huy despues tambe. Pues no tabata mucho dificil pa bay busk’e awe pa e para responsabel pa su acto, cu den terminologia di ley, ta considera como intento di asesinato.
