Awenochi a tuma luga apertura oficial di e tienda nobo di AMC Unicon, situa riba L.G. Smith Boulevard unda antes tabata ARVEFA, net banda di De Palm Tours. Den un ambiente ameno, cu hopi invitado, a habri e “AMC Unicon Mega Store”. Prome cu a corta sinta tabatin un ceremonia na unda diferente hefe y invitado a duna un discurso cortico.
Pa mas o menos 7:20pm a corta sinta pa asina celebra e apertura oficial di e “AMC Unicon Mega Store”. Despues di e ceremonia, a invita tur invitado pa drenta paden y admira e surtido y variacion enorme cu tin den e edificio. E concepto nobo y moderno aki, ta haci mas facil pa clientenan por logra haya tur cos bou di un solo dak. E productonan y opcionnan pa cumpra ta varia entre “Home and Nature”, “Radio Shack”, “Optica Unicon” y tambe “Ashley Furniture”, cu ta marcanan mundialmente renombra y gusta pa un y tur. Hopi exito na AMC Unicon cu nan inversion y edificio nobo nobo.
