Despues di un proceso extenso y riguroso pa yega na e persona cu lo tuma e responsabilidad di dirigi e compania estatal Arubus NV, awe Minister di Transporte, Chris Romero, a anuncia oficialmente cu e Director nobo a keda den persona di Edwin Mohamed. E ultimo aki tabata Presidente di e Hunta di Supervision, a solicita y despues e mesun Hunta a scog’e como e miho candidato pa sigui dirigi e compania cu desde aña pasa e tabata supervisa caba!
Hunta di Comisario di Arubus, cumpliendo cu e deseo di Minister Romero, a apunta un compania internacional specialisa pa realisa e proceso di scoge e Director nobo di Arubus NV. Tabatin un cantidad considerabel di candidatonan cu a aplica, di cual a scoge 11 candidato na prome instante. Despues di a pasa den e proceso di revision, cumpliendo cu exigencianan di e Hunta di Comisario di Arubus NV, finalmente a yega na Edwin Mohamed como esun capacita pa e funcion di Director.
Edwin Mohamed tin un Bachelor’s Degree den e area di Applied Electrical & Electronic Engineering. El a caba su estudio na Saxion Hoge School, na Enschede, Hulanda. Actualmente Mohamed ta completando su Master’s Degree den Business Administration na Universidad di Aruba.
Pa e ultimo 17 aña, Edwin Mohamed a traha na nos compania nacional di telecomunicacion, Setar NV. Ultimamente Mohamed a desempeña na Setar como hefe di e departamento di Business Telecommunication System (BTS).
Edwin Mohamed a asumi e reto como Director di Arubus NV y a compromete su mes di sanea e situacion financiero y mehora e servicio di e compania, manteniendo semper como prioridad e bienestar y necesidad di su usuarionan. E enfoke principal awor aki ta pa duna e compania estatal di transporte un cara nobo y pa cu esaki lo bin cu cambionan den e flota di bus y demas ekiponan cu lo modernisa.
Di acuerdo cu Camara di Comercio, desde October 2018 ya caba a nombra Edwin Mohamed como Director interino caba y desde awe a nombr’e oficialmente como Director di e compania. Ta bon pa menciona cu prome cu esey Mohamed tabata Presidente di Hunta di Supervision di Arubus NV.
Cu nombracion di Mohamed awor como Director, e Hunta di Supervision a bira:
- Luigi Bergen – Presidente (Coordinador di Minister Romero)
- Roy Milton (Jr) Harms – Comisario
- Rubinah Bernadina – Comisario (Mama di e yiunan di Minister Romero)
- Charles Vis – Comisario
