Despues di dos dia cu defensa den caso Avestruz a hiba palabra, a constata cu nan tin basta punto en comunidad. Esaki ta e punto cu a engaña pais Aruba.
Ministerio Publico a bisa cu no ta husga cu a bende un compania cu a haya un tereno comercial for di gobierno. Loke cu OM ta tuma e acusadonan na malo ta cu a engaña pais Aruba. A gaña cu ta un berdadero inversionista mientras cu e idea tabata pa haya e tereno, bende y haya bon ganashi. “Y esaki no por,” Procurador General a trece dilanti.
Dialuna merdia y diamars henter dia defensa di: Benny Sevinger, Peter Sussebeek, Ninosca Nuñez, Gaby Werleman, Carlo Mansur, Curt Harms y Leoncita Harm a trece puntonan dilanti cu no por papia di cumpra Benny Sevinger, kende a simplemente a sigui e maneho di duna tur hende oportunidad igual. Bisando DIP (Departamento di Infrastructura y Planificacion) “gaarne uw medewerking”. Y esaki a sosode cu no solamente e casonan cu tin den corte awe, den caso Avestruz, pero casi 300 peticion pa tereno comercial den e periodo cu e tabata gobernante.
Den e caso di Pieter Sussebeek, amigo di bida largo di Sevinger, defensa a bisa cu no tin motibo pa cumpra e mandatario di e tempo ey. E acusado tin diferente compania y via e diferente companianan a haci peticion pa desaroya tereno. Y no ta tur el a bende. “Mi cliente ta un pionero den mundo di construccion. E centro comercial La Hacienda ta un ehempel,” abogado mr. Illes a trece dilanti.
“Con por ta posibel cu ta pidi pa condena Sevinger di complice den “oplichting” y e dos personanan cu kendenan e lo a comete e delito aki, a wordo declara liber. Mas ainda. Ministerio Publico no a apela e decisionnan ey,” abogado mr. David Kock a trece dilanti.
Illes a bisa cu no por papia di labamento di placa djis pasobra el a bende un tereno y a deposita e placa aki riba un cuenta di dje na Corsou. Ministerio Publico a simplemente saca e conclusion ey,” el a bisa. Y soborno, tampoco por proba. Tur e placa cu el a uza pa haci Sevinger fabor di cumpra algun material p’e, a wordo paga. Hasta tin transaccion di e pago cu a drenta.
Abogado mr. Rudi Oomen mainta, y tambe mr. Vito Carlo a hiba defensa pa nan clientenan Ninosca Nuñez y Gaby Werleman, y Carlo Mansur respectivamente. Nan tabatin puntonan similar, cu excepcion di e motibo pakico a bende e negoshi.
Ambos a cuminsa cu e punto cu bende e sharenan den un compania no ta contra ley. Tampoco ta skirbi un caminda cu ta prohibi pa bende e compania mientras cu e procedura ta andando. Pero, no a bende e compania Damari /Lizner prome, sino tres luna despues. Motibo cu e pareha a duna tabata cu a bay busca un inversionista ora cu a haya un tereno un tiki mas grandi cu nan a pidi, pasobra no tabatin otro. A haya inversionista, pero e tabata kier tur e sharenan. No tabata interesa pa tin socio. E oferta tabata bon y a dicidi di bende. Mansur di su banda, tabatin placa pa inverti pero a surgi un problema personal pa cual el a pensa cu ta miho pa no afecta e proyecto y hala atras. “Pero mester mira cu e balor di e tereno tabata 5 miyon dollar, y a bende pa 3.5 miyon dollar.”
Oomen a señala tambe cu hues den prome instancia den su decision a bisa cu “no por prueba cu di antemano e decision tabata pa nan mes no construi. Pero tabata bisto cu algun luna despues di a haya e tereno nan tabata activamente buscando cumprado pa nan compania”. A lubida di menciona den e sentencia, segun Oomen, ta pasobra e inversionista cu a haya tabata kier e compania y no mester di socio.
Ademas, tur e abogadonan tabatin e punto aki, si tabatin algo contra ley, con e acta a pasa via di Notario toch. Y a mustra riba e declaracion di un Notario, kende a bisa cu e no tabata na altura di algo cu ta stroba e traspaso.
Ademas, den e compania di Damari tabatin en total cinco persona envolvi y tur a haya placa, pero esunnan cu a hiba dilanti tabata su clientenan, esta Nuñez y Werleman, y e otro acusado Mansur.
Den caso di Curt Harms a acus’e di soborna Sevinger, haciendo un donacion mas grandi cu normal (na Fundacion Curason Berde) el a haci den e otronan campañanan. Ta papia di un suma di 92 mil florin. Esaki pasobra e lo tin un peticion pa tereno. Pero mr. Vito a trece dilanti cu OM ta confundi pasobra ta e yiunan di su cliente a haci donacion. Curt Harms a haci un peticion pero no den tempo di eleccion y un peticion cu el a haci no a wordo honra.
E prome ronda den caso di Avestruz den hof a finalisa cu abogado mr. Doris Canwood. Despues di e aspectonan tecniconan, manera cu no tin ley cu ta stroba e traspaso di su cliente, a bin riba e parti di soborno. Tur e declaracion di e principal testigo di OM, Luegen Roga (Leugen manera mr. David Kock a yam’e), ta basa riba pensamento propio y cu no tin otro prueba pa demostra cu loke el a bisa ta corecto. Den palabranan similar e abogado a señala cu Roga a haci su mesun optel sommetje pa condena
Leoncita Arends. Pero e prueba no t’ey. Su declaracionnan ta contradeci otro. Y a presenta e famoso prueba di un stapel di 10.000 mil florin di cual mester tin 10 di e stapel aki pa e 100 mil florin cu e testigo aki ta bisa el a hiba pa Sevinger. Pero dies stapel no ta pas den envelop cu riba dje tabata dobla na cuater, segun e testigo. Loke si ta pas den un envelop di cu un haltura di mas o menos 7 centimeter ta e ticketnan di lotto cu su cliente (Arends) y esposa di Sevinger ta bisa, tabatin den e envelop.
A entrega na corte e envelop cu e ticketnan di lotto bieu como prueba.
Diaranson mainta Procurador General y e abogadonan ta haya un chens mas, pa despues acusadonan yega na nan ultimo palabra.
Segun mester Canwood a splica, e intencion di Hof ta pa duna un decision prome cu reces drenta, na luna di juli. “Nos ta custumbra cu Hof ta cumpli cu loke e palabra,” Canwood a bisa.
