Desde cu cos a cuminsa te cu awor aki, a purba di yega tur areglo cu ta posibel cu Penha. A bay mediador. Esey ta e prome paso cu a tuma. Despues a purba di manda un carta pa nan bisando nan kico ta loke nan ta pensa cu ta husto pa nan, segun Solanyi Reynoso ex trahado di e establecimento.
Den un rueda di prensa e ta comenta cu no por a yega na un areglo. Nan a ofrece e trahadonan prome dos luna mas di salario. Despues a bin un luna mas acerca, despues a haya carta di abogado. E ultimo carta cu a haya unda cu a bisa e trahadonan cu si no tuma e oferta cu nan ta dunando e ora tin cu considera un scenario di bancarota.
Despues di esaki a dicidi di tuma accion y e ora ey a manda hues un peticion e siman aki pidiendo pa por fabor si e por a pone beslag riba cuenta di Penha pa por sigura pago di e trahadonan cual nan tin derecho riba dje.
Actualmente a logra esaki. Awo nan por hala rosea y tin tiki di trankilidad pasobra esey a bay positivo. Kiermen hues a duna e trahadonan loke nan a pidi y nan ta hopi contento pa esey.
Cuanto nan ta
Di e tienda nan tabata seis trahado en total den Penha Plaza Daniel Leo. Dos persona a bay cana nan caminda nan mes y nan a keda cuater uni. Segun Reynoso, awor aki lo bay wak kico ta e reaccion di Penha. Semper nan tabata open pa negosha. Lamentablemente Penha no. E trahadonan no a logra ni cu mediador, ni cu labor. E proximo paso awo ta corte.
Awor aki ta sinti cu e beslag aki nan ta hopi mas delanta cu cuminsamento. Nunca nan a bisa no cu nan no lo sinta cu nan. E problema ta cu Penha nunca tabata dispuesto pa esaki.
Mediador ta na altura y a purba pa por interveni pa e trahadonan, esta participa den e negociacion pa wak kico ta derecho di e trahadonan.
Pero e compania no tabata di acuerdo cu esaki.
Kico awo
E trahadonan tin amor pa e compania. Esey semper tabata tey. Pero awor aki Penha tin cu tuma e decision, si nan ta dialoga cu e trahadonan. Basta biaha nan a purba di yega na un palabracion, sinta na mesa pa wak kico e ta. Ta compronde cu ta un temporada di pandemia. Pero esey no ta nifica cu tin cu tuma kico cu ta. Ta trahado di 8 aña, 5 aña y mey. Nan a purba toch, pero pa awor aki nan ta habri pa esey tambe. No ta ningun problema si nan kier sinta papia cu nan.