Sindicato di Maestronan di Aruba (SIMAR) hunto cu SEPPA y SPA a marcha pa entrega nan carta urgente referente e problemanan y reglanan cu gobierno a bin cu nan door di COVID-19. E marcha a cuminsa for di ex DOW direccion Parlamento entregando e cartanan na Presidente di Parlamento, despues a bay Bestuurskantoor.
Aki nan a entrega e cartanan na Minister President, Evelyn Wever den presencia di ministernan Andin Bikker, Dangui Oduber y Chris Romero. E sindicatonan a splica e ministernan cu tur esaki ta bin riba e maneho cu ta tumando decisionnan y no ta sinta cu nan pa dialogo.
Segun Josephine Albertus, presidente di SIMAR, nan a sinta 1 biaha cu Minister di Enseñansa pero no a ricibi informacion di minister. Nan no ta di acuerdo con e mandatario ta hibando e maneho. Un di e puntonan cu no ta di acuerdo ta cu desde a bisa cu scolnan ta habri, pasobra ainda tin miedo mirando cu no ta bisa con lo atende cu e situacion aki. Tambe no a duna garantia cu e situacion no ta prehudicial p’e alumnonan y maestronan.
Magaly Brito di SEPPA a entrega 2 carta, cual uno ta e mal contento di werksternan di SKOA y cu COVID-19 a bira un excusa nobo. Segun e carta di werksternan desde aña pasa december nan tin incertidumbre di Minister di Enseñansa. Nan kier sa unda nan ta para, ya cu a bisa nan ta cay bou “exploitatiekosten” of “personeelskosten.” Werksternan kier un aclariacion riba e parti aki. E otro carto di SEPPA ta indica cu ta haciendo uzo di e virus como un excusa. Cu e carta aki e manifestantenan ta mustra cu nan ta rechasa e imposicion riba salario di trahadonan y rechasa e cambionan unilateral den enseñansa.
Pa mas informacion por lesa riba e linknan aki e cartanan di ambos sindicato.