Fundacion Plan di Bida Aruba tin un proyecto yama ‘Finansa den mi Hogar’, hunto cu minister di Asunto Economico, Comunicacion y Desaroyo sostenibel, Geoffrey Wever. Den luna di november a cuminsa e curso aki na Paradera y esaki tawata uno exitoso.
E curso “Finansas den mi hogar” lo cuminsa día 27 di februari 2023 na San Nicolás unda cu nos lo ta den centro di bario Brazil. Esaki lo ta di 7:30pm – 9:30pm.
Segun Paloma Osorio, e ta curso ta consisti di 4 sesion diferente, unda cu cada sesion ta papia loke ta e importancia di sa con pa maneha e finansa den un hogar.
E prome sesion ta papia di con por ta efectivo den hogar. Hopi biaha como ser humano nos ta move abase di nos emocion lo cual por tin consecuencia negativo pa nos finansa.
Den di dos sesion: Con mi ta paga mi debe. Hopi hende kier mantene un status social halto. E presion social ta hopi fuertey hopi biaha bo por haya bo mes den problema unda cu bo ta cay den tentacion caminda cu por presta placa cerca e companianan di credito cu ta masha famoso mes. E consecuencia ta cu tin debe hopi biaha innecesario. Kico tin un debe, con ta paga e debe, con por ta un bon pagado ta temanan cu lo toca durante e sesion.
Di tres sesion ta: Mi ta inverti den mi futuro. Como persona nos mester fiha pa tin un miho futuro. No conforma cu loke tin aworaki, pero con por tin un miho futuro p’e famia.
Di cuater sesion: Presupuesto. Budgeting ta conoci awendia, pero kico e ta ?Basicamente: compara entrada cu salida y con por implementa esaki den nos bida diario.
Na final di e curso cada cursista lo ricibi un certificado di participacion.
Ta invita cada un cu ta desea di participa pa haci esaki pa asina haya e sosten necesario pa un bon maneho di finansa. Registracion ta completamente gratis, pero cupo ta limita.
Segun CBA,
Na Aruba 3 di 10 hogar ta gasta mas di nan entrada tur luna segun sondeo di Banco Central di Aruba. E desaroyo aki ta uno preocupante pasobra e ta indica cu cada luna ta un reto pa hogarnan cumpli cu tur necesidad y responsabilidadnan financiero manera entre gasto pa vivienda, cuminda, y prestamonan personal. Como consumidor ta importante pa sa ki impacto cada decision financiero tin riba nos cartera y nos hogar.
Pa mas informacion y registracion por tuma contacto cu Fundacion Plan di Bida via telefon 5688848 of e-mail [email protected].
