Segun vocero di AZV, Solange Tchong, tin algun dokter di cas cu a bandona Aruba inesperadamente, unda cu tabata tin un contract pa un tempo indefini, cu nan lo keda semper Aruba. Esey a crea un tiki e presion pasobra ta haya cu un practica cu diripente e dokter di cas ta bay y bo mester busca un reemplaso p’e. Berdad e otro ta esunnan cu ta bay cu edad di pensioen, of en todo caso cu ta stop na 65 aña. E contract di AZV ta termina, dus nan no por sigui. Eseynan tambe mester a reemplasa.
Si ta monitorea e cantidad di dokter di cas cu mester, esey ta sigur. Pesey mes, e 9 personanan cu ta dentro di e huisartsentraject cu tin un opleiding cu ta hunto cu vrije Universiteit di Amsterdam, den e estudio eynan, tin 9 persona den dje y e cuponan ey ta garantisa caba.
Sa awor como AZV caba cu e personanan cu ta den e trayecto aki, lo haya un contracto cu AZV pasobra tin e necesidad ey, door cu e siguiente añanan cu ta bin, en berdad tin algun dokter di cas cu ta bay yega e edad di 65 aña. Tin uno dentro di e periodo di 2 aña caba, anto akinan ya sa cu tin cu cuminsa reemplasa e dokternan di cas. Ta bay pa un temporada nobo na unda cu berdad esunnan grandi tin cu cuminsa bay cas y duna caminda pa e nobonan cu ta bay drenta.
Ubicacion
Segun Tchong, nan ta haci peticion na dokternan di cas cu mas hopi posibel pa nan ubica nan mes den e area unda cu AZV ta desea esey. Den transcurso di añanan, no tur ora a bay exactamente manera cu AZV tabata kier, pero ta purba toch si pasobra nan ta mira cua ta e areanan of vecindarionan unda cu tin mester di mas dokter di cas. Sigur cu si ta evalua esaki tambe.
Dokternan local y di exterior
Tin e yiunan di tera cu ta bezig cu opleiding. Den pasado tabata tin tambe entre otro dr. Diante de Cuba, dr. Morales-Thuis. Awor aki tin un otro grupo cu tambe ta bezig den e trayecto aki. Pa AZV e mas importante ta cu bo tin dokternan di cas cu a pasa den e trayecto aki, pasobra dokternan di cas ta un specialisacion. No ta con kier bo ta bira un dokter di cas. Bo ta studia hopi aña pa bo yega eynan. E ta wordo considera como un specialisacion. Esey ta e personanan cu awor aki tin 9 den e trayecto eynan y tambe tin algun cu ta yiu di tera den e opleiding aki.
