“Recientemente SMOA por a lesa den media cu prijs di buki di Colegio Arubano a subi masha hopi. E articulo a menciona cifranan cu ta incorecto. Lastimamente no a check cu SMOA kico e prijsnan ta di berdad. E noticia ta fake news”, asina un comunicado di prensa emiti dor di Stichting Middelbaar Onderwijs Aruba, SMOA, presidi pa Robert Croes, ta bisa. Parce cu e media a indica cu bukinan a subi di Afl. 1.700 te cu Afl. 3.900, locual SMOA ta desmenti.
SMOA a comenta cu nan mes ta cumpra e bukinan y e prijsnan a hisa. E prijs total di buki ta depende di e materianan cu e alumno ta tuma. E balor di prijs a subi alrededor di 15% cu ta e aumento di gastonan, etc. E prijsnan ta varia entre Afl. 570 – Afl. 1.600,=.
“Nos a cuminsa e aña escolar bon awe cu tur docentenan riba bon pia. Contrario na loke a transmiti den media prome cu e encuentro, cu e aña a cuminsa cu maestronan disgusta”, asina SMOA a sigui bisa den su comunicado. Claro cu e informacion aki ta contrario na locual docentenan a sigura na nos durante e ultimo dianan aki. Parce cu e mesun SMOA a informa docentenan cu e nombracion di e Conrector nobo, sin un solicitud habri, ta temporario.
