Sospechoso di manda placa den galiña a paga 300 mil Euro pa su libertad

Aña pasa caba tabatin sentencia den e caso di “kiprollade” unda cu via Aruba a trata di pasa un suma grandi di placa laba. Pero nan a wordo descubri. E Belgo di 77 aña, biba na Hulanda cu mester a percura pa e transporte, a wordo condena door di Corte. E siman aki el a yega na un acuerdo cu Fiscal di Ministerio Publico. Cu e acuerdo aki, su apelacion ta wordo hala aden. Inicialmente el a apela e veredicto di un castigo di prison di 3 aña di cual un parti tabata condicional. Tur esaki pa labamento di placa, transporte di placa efectivo den “kiprollade”. Esaki tabata net na tempo pasobra e apelacion mester a wordo trata diaranson mainta.

Un investigacion largo na 2015 a conduci na descubri placa efectivo cu tabata transporta pa Aruba den carga di “kiprollade”. E Belgo tabata doño di e compania di “kiprollade” y a detene bou sospecho di labamento di placa.

Den razzianan teni na Hulanda, Belgica y Aruba, a descubri algun miyon Euro, pero no a logra haya sa di unda of di kende e sumanan grandi di placa aki ta. En total Husticia a confisca mas cu 1.1 miyon euro. E placa aki tabata confisca y awor e Belgo a distancia di e placa aki y e mercancianan na balor di mas cu 800.000 euro. Banda di esaki el a paga un transaccion di 300 mil euro.