Diamars atardi e cantante Nurlaila Karim a tene un conferencia di prensa den Cas Cultura caminda cu e lo haci un show cu tributo special na e legendario Tina Turner.
Despues di un tour exitoso na Hulanda unda e show a wordo presenta den 54 teatro, e show “Fourtina” awor lo wordo presenta awe nochi den Cas di Cultura y diabierna na Fusion Restaurant den Alhambra Mall.
Durante e conferencia di prensa Nurlaila Karim a comparti cu e lo canta cancionan fanstastico di Tina Turner, manera Private Dancer, Proud Mary entre otro. Den e tour “Fourtina” Nurlaila ta canta e repertorio imprecionante di Tina Turner. E show ta un experiencia teatral inolvidabel yen di pasion, energia, rock, blues y un show di luz spectacular. Nurlaila ta wordo acompaña pa su backing vocals Jasper Taconis, Nicky van der Kuyp y un banda poderoso.
Nurlaila ta sin duda un di Hulanda su cantantenan mas multifacetico. Cu rolnan principal den musicalnan manera “Miss Saigon”, “Les Miserable”, “The Wiz”, “RENT”, y “The Bodyguard”. Riba Youtube por haya previews di “Fourtina”. E show aki ta forma parti di “The Road to the Caribbean Sea Jazz Festival”. E show lo tuma lugar na Cas di Cultura diaranson 16 di Augustus pa 8’or pm pa solamenente $30,- , mientras cu e show na Fusion Restaurant ta un “dinner and wine pairing” show riba diabierna 18 di Augustus for di 7’or pm. Tickets ta obtenibel na Cas di Cultura, Fusion Restaurant, Casibari Café y Superfood Plaza.
No lubida di pasa cumpra bo tickets pa e Caribbean Sea Jazz Festival obtenibel na Superfood, Casibari Café, Citgo, Plaza Bookshop of Caribbeanseajazz.com
