E fenomeno aki yama un Halo. Nos ta simplemente yame un renchi. Awe e solo a sali na un manera hopi particular cu den masha hopi tempo no a mira esaki na Aruba. Normalmente tipo di fenomenonan aki bo ta hay’e na luganan friu, caminda cu e particulanan di ijs ta topa cu e rayonan di solo y ta saca un splendor cu ta mustra cu tin un renchi rond di e solo.
Definicion
Segun e website di informacion Wikipedia, e palabra Halo, ta nomber di un famia di fenomenonan optico, produci pa luz cu ta interactua cu cristalnan di ijs suspendi den e atmosfera. Halonan por wordo tin hopi forma, for di renchinan di color of blanco, te cu arco y manchanan den shelo. Hopi di esaki ta cerca di e Solo of Luna, pero otronan por haya nan den otro parti of hasta dene parti opuesto di e shelo. Entre e tiponan di halo mas conoci, ta haya e halo circular, pilarnan di luz y domes, pero tin hopi mas, algun di nan bastante comun, otronan extremadamente straño.
E cristalnan di ijs ta responsabel di e halonan, sa ta suspendi den cirro of cirroestrato (5-`0 kilometer) den e parti superior di e troposfera, pero den climanan friu tambe e por flota cerca di tera, den cual caso ta wordo refero como “diamond dust”. E forma y orientacion particular di e cristalnan ta responsabel di e tipo di halo observa.
E l;uz ta wordo refleha y refracta pa e cristalnan di ijs y por dividi den color debi na e dispersion. E cristalnan ta comporta como prisma y spiel, refractando y reflehando luz entre su caranan, mandando rayonan di luz den direccionnan particular.
Fenomenonan atmosferico, manera halo, ta wordo uza como parti di e conocimento di e clima, como un medio empirico pa e pronostico di tempo prome cu a desaroya meteorologia. Hopi biaha e ta nifica cu awasero lo cay dentro di e proximo 24 ora, ya cu e nubianan cirrostrtus cu ta caus’e por nifica cu un sistema frontal ta na caminda.
Otro fenomenonan optico comun cu ta envolvi gotanan di awa na luga di cristalnan di ijs, ta inclui e gloria y regenboog (arco iris).
Ainda bo ta na tempo pa bo mira e bunita fenomeno aki, cual ta duna un impresion di “intervension divino”. Pero corda semper, no fiha directamente den solo, ya cu e por afecta bo bista. Mescos den e caso di un eclipse solar, uza brilnan di proteccion si bo kier mira e fenomeno aki.
