Partido “Aruba su Bienestar Organisacion”, conoci como “A.B.O” ta bay den historia politico di nos pais como e prome partido cu no ta logra haya suficiente firma di sosten pa e por participa den eleccion di Parlamento, asina director di Censo Civil, mr. Sharin Luydens a confirma awe mainta. Aruba lo bay eleccion dia 22 di september proximo cu 8 partido politico, cu ta Arubaanse Volks Partij (A.V.P), Movimiento Electoral di Pueblo (M.E.P), lista combina PPA/UPP, Red Eternal Democratico (R.E.D), Movimiento Arubano Soberano (M.A.S), Pueblo Orguyoso y Respeta (P.O.R), RAIZ y
Cristiannan Uni Reforsando e Potencial di Aruba (CURPA).
Partido ABO no ta nobo pa e eleccion aki, pero no nobo den politica. E ta existi pa casi 3 aña caba, funda dia 10 di December 2014 door di Elton Loe-A-Tjam como un partido di ideologia social liberal. Semanalmente, tin biaha mas di un biaha, ta emiti comunicadonan di prensa y ta elabora riba varios tema den comunidad, pues desconoci nan no ta. Esaki lo mester a bira nan prome eleccion.
Di acuerdo cu conocedonan di e materia, den pasado hopi biaha e partidonan politico chikito cu no tabata haya suficiente firma di sosten, tabata haya ayudo di e partidonan mas grandi cu tabata manda nan sostenedonan pa firma pa e partido nobo. Esey pasobra mas partido, mas voto perdi, mas restzetel cu mayoria bez ta cumbini e mesun partidonan grandi. Pero den e caso specifico aki, niun di e partidonan grandi a opta pa saca un man pa ABO, cu na final a termina cu 487 firma, den bez di 578, manera prescribi pa ley.
E proceso electoral ta sigui awo, riba ruta di eleccion. Dia 4 di augustus ultimo, 9 partido a entrega nan lista. Un total di 7 di nan no tin representacion den Parlamento, pa cual nan mester haya 578 firma di sosten. Por a haci esey te cu diamars dia 15 di augustus.
Diabierna awor dia 18 di augustus, lo tuma luga un reunion formal di Conseho Electoral pa controla e listanan. Nan tin te dia 21 di augustus 2017 pa por notifica partidonan por escrito tocante cualkier omision cu nan a constata, por ehempel si falta documento. E partido lo tin te dia 24 di augustus 2017 pa corigi loke falta.
Riba dia 25 di augustus 2017, Conseho Electoral lo tene un sesion publico den cual lo dicidi riba valides di e listanan di candidato y su tras lo publica e lista di candidatonan. Di ey lo numera e listanan y duna nan un color. Dia 29 di augustus 2017 lo numera e lista di partidonan riba stembiljet, via un sistema di sorteo.
