Por a tuma nota cu Anselmo Pontilius, mediador di Gobierno, ta mediando den un disputa entre STA y Elmar. Por a mira cu no tin solucion ainda den esaki.
E ta comenta cu tin cu remarca cu sindicato STA ta representa e mayoria di e trahadonan na Elmar, desde cu nan a gana e referendum mas cu 2 luna pasa. Den e caso aki, e sindicato a trata di sinta na mesa cu gerencia y vice versa. Nan no a yega na otro, di un punto principal tabata cu gerencia ta informa cu nan no lo duna liber cu pago na e shopstewardnan cu STA a eligi, ya cu nan no tin un acuerdo firma cu otro.
Na e momento ey a yama e partidonan na mesa, ya cu no tin e parti di e contracto colectivo riba mesa, pero e parti ey dicon e partidonan tin cu traha cu otro. A redacta un documento. E documento eynan, di parti di sindicato STA nan a bay di acuerdo pa firma esaki. Gerencia di su parti a haci cambionan den e documento cu mediador a presenta y eyriba a surgi un diferencia di opinion tambe, considerando puntonan cu di parti di sindicato no por a acepta.
Den corto a pidi e partidonan pa trata internamente e puntonan di diferencia cu tin y e puntonan di diferencia cu tin ta cu entre otro, di parti di gerencia di Elmar ta señala cu si nan firma e documento cu mediador a presenta na e partidonan, nan ta pidi sindicato STA firma un documento cu nan ta yama sociaal protocol cu no ta nada otro e documento cu ta cubri e reorganisacion di e empresa Elmar entrante Januari 2018.
E documento eynan ta encera diferente capitulo y di parti di sindicato STA nan a pidi pa studia esaki mas den detaye. Mirando esey, a keda di reuni siman pasa, conhuntamente. E reunion no a bay door, ya cu di parti di Elmar nan ta informa cu si ta durante oranan di trabao, e shopstewardnan no ta haya liber cu pago. Esey ta un diferencia di opinion entre partidonan cual tin cu wordo resolvi, cual lo wordo resolvi tambe. Den e caso aki a percura pa traha un otro documento, den cual e ora ta cubri e puntonan mas detaya di cada partido.
E documento eynan a entreg’e diahuebs siman pasa y a pidi e partidonan durante curso di e siman aki si nan tin cambio, informa mediador di dje y ta invita e partidonan pa otro siman na mesa dialuna, pa mira si por haya otro. Den otro palabra, trata di firma un solo documento cu ta cubri tur area. Entre otro e liber cu pago pa shopsteward cual ta algo masha normal. Y tambe e firmamento di e protocol den cual ta cubri entre otro tur loke ta encera e reorganisacion di Elmar. Un di e puntonan di preocupacion cu sindicato STA a señala ta cu e reorganisacion aki lo por tin consecuencia pa cuponan di trabao. Durante reunion, un biaha mas gerencia a señala por escrito, cu no ta asina cu e trahadonan cu tey lo perde trabao. Al contrario. Den caso di reorganisacion di Elmar, tin programanan cu tin cu prepara e trahadonan pa adapta na diferente oro tareanan cu nan ta bay tin, pero mas cu tur cos, nan lo emplea mas personal tambe den e proceso di reorganisacion cu ta cuminsa entrante otro aña.
Ta spera cu entrante otro siman ta na mesa. E pensamento cu mediador por impone cualkier tipo di acuerdo, no ta insisti. E institucion aki, manera cualkier institucion, ta traha cu ley. Consecuentemente, mediador di gobierno tin un trabao pa convence e partidonan pa yega na otro. Den e caso aki, no tin negociacion di contracto colectivo. Tin diferencia di opinion riba con ta atende cu otro, con ta traha cu otro. Pesey a prepara un documento cu ta cubri e area, una bes cu nan firm’e e partidonan mes por keda na mesa, sin presencia di mediador di Gobierno.
