Minister Otmar Oduber durante di Conferencia di Prensa di Gobierno di Aruba cu a tuma luga diahuebs, a amplia riba entre otro e situacion di terenonan otorga pa Gobierno anterior den periodo demisionario. ‘Nos a tuma tempo pa analisa tur documentonan, acuerdonan y contractnan cu a wordo firma den e periodo demisionario di Gobierno. Conseheronan huridico a mustra cu Gobierno no mester a tuma decisionnan cu por perhudica e maneho di e Gobierno cu ta bin na turno.
Consecuentemente, tur e acuerdonan (overeenkomsten) cu a tuma luga pa loke ta e otorgamento di kioskonan na Welcome Plaza cu a wordo firma riba 7 di november 2017 door di e Gobierno anterior ta wordo declara ‘nietig’ como cu esakinan no ta conforme reglanan y leynan cu tin. Mescos ta e caso cu diferente huurgronden cu a wordo firma door di e Gobierno anterior unda cu ta otorga personanan entre 20 pa 40 mil meter cuadra, cual ta bay ful contra e situacion actual cu tin pa loke ta necesidad di tereno pa por ehempel desaroyo agricultural y pa cria di bestia. Hopi persona ta buscando un pida tereno pa por eherce nan ofishi/hobby. E maneho cu colega Minister Chris Romero a anuncia ta uno pa haci di sector primario un pilar economico adicional na Aruba. Esaki lo wordo perhudica cu e decisionnan tuma pa loke ta tereno door di Gobierno anterior.
Tur e acuerdonan aki (mas cu 20) lo ricibi carta indicando cu ta declaranan ‘nietig’ mirando cu e otorgamento a wordo duna den un periodo di despedida di e Gobierno anterior. Minister Otmar Oduber a sigui splica cu mescos a tuma luga pa loke ta e casnan y terenonan na Colony/ Sero Colorado. Cu tambe den e mesun periodo aki un cantidad di hendenan cu no a pasa e proceso debido cu ta defeni na DIP pa bin na remarca pa e casnan aki, a ricibi esakinan. E personanan aki lo wordo mustra riba e situacion cu a bay robes, pa duna nan e oportunidad di aplica di nobo segun reglanan di e departamentonan concerni. Pa Gabinete Wever – Croes, ta importante pa un y tur den comunidad tin derecho igual pa bin na remarca pa sea e ta un huurgrond, kiosko, cas, entre otro.
