Dia 1 di September a pasa y segun minister di Finansas, e presupuesto ta den su fase final. Door cu tin eleccion y door cu tin normanan, otro aña a base di ley LAFT cu ta cay bao di supervision di CFT y door cu tambe awor cu den eleccion tin asina tanto proposicion.
Nos por a scucha partidonan den campaña ta bisa cu mester bin mas polis, mas maestro, mas douanero, mas hende na KIA, mas aki, mas aya. Ta den un temporada di pidi. Tur hende ta pidi. Sindicatonan ta pidi, prensa ta pidi entrevista, pero esey ta e temporada awor aki. Tur banda ta pidi, pidi, pidi. Tin cu tene cuenta cu recursonan financiero ta limita, den sentido cu tin cu topa e normanan, manera cu a haci ultimo tres añanan a base di ley di LAFT. Pa otro aña e norma ta cu mester yega na un presupuesto cu un saldo positivo di mas of menos 0.5%. E aña aki, e meta ta cu mester yega na un deficit cu no ta mas grandi cu 0.5% di GDP. Esey kiermen cu entre e aña aki y otro aña tin cu bolter e deficit di mey procent den un surplus di mey porciento. Ta un porciento di diferencia. Esey so ta exigi cu tin cu reduci bo gastonan cu 50 miyon. E ora ey, e minister a menciona cu e no ta bay yena e presupuesto cu tur sorto di iniciativa, di maneho pa otro aña, pero laga esey pa loke ta e espacio, pa e Gobierno nobo cu lo sinta despues di eleccion, pa asina eynan nan tin e espacio pa nan por hinca den e presupuesto di otro aña e parti di maneho cu nan kier yega na dje. Tin cu traha totalmente un otro forma di presupuesto, basa riba liñanan grandi, cifranan den totalidad. Esey ta un cambio pa departamento di finansas. E ta biniendo cla. Ta spera cu pa otro siman por haya e ultimo draft cu por dicidi riba dje den Ministerraad pa asina e por bay.
Presupuesto di mas aña
Minister Angel Bermudez a menciona cu esey tabata cu e colegio di supervision a haci na 2015 pa entrega un presupuesto di dos aña di 2016 y 2017. Ora cu a cuminsa cu e ehercisio ey, a sali afo cu e ta masha dificil basa riba e ley di contabilidad. Tambe basa riba diferente structura di gastonan cu tin. Pesey e ora ey aña pasa a laga e proposicion eynan bay y a sigui riba e sistema di presupuestonan anual.
Prome of despues di eleccion?
E mandatario a splica cu no ta haci mucho diferencia pa entrega e presupuesto prome of despues di eleccion. E parlamento nobo cu wordo forma despues di eleccion lo trat’e. E ta haya ta decente cu e Gobierno nobo, cua cu ta cu sinta despues di eleccion, mester tin espacio pa por hinca aden loke cu e kier inclui pa por hiba su maneho. E ta kere no ta na su luga, pa e minister yena e espacio eynan pa asina pa kita tur espacio asina ey pa e añanan venidero. Si ta keda e diferente normanan, esun di ley di LAFT, etc. cu mester wordo teni na cuenta. Cu esey ta e limitenan cu e presupuesto ta keda cun’e.
