Ta algo hopi serio pa tuma nota e forma con Minister di Enseñansansa, ta falta respet pa Parlamento dor di neglisha por completo un mocion aproba cu 18 voto na fabor, pa cancela den fora definitivo, su plan di independisacion di scolnan publico.
Lider di fraccion di AVP, sr Marlon Sneek ta mustra cu dia 20 di april 2018 durante tratamento di presupuesto 2018 di pais Aruba, fraccion di AVP a entrega un mocion caminda ta ordena e minister pa cancela su decision pa independisa enseñansa.
Sinembargo awor tur hende por tuma nota cu e minister ta sigui tuma decisionnan cu ta mustra cu el a pone e mocion aki un banda y ta sigui e rumbo cu e mes a fiha cu e kier hiba.
“Nos ta un Minister di enseñansa cu a bin parlamento pa defende su presupuesto y den e presupuesto aki a entrega un mocion pa bisa e minister pa deshaci di e idea pa privatisa scolnan cu ta cay bou di DPS y nos ta mira cu e minister ta coy e mocion, pone esaki un banda y ta dal bay manera cu nada a pasa.
Esaki ta ministernan cu nos tin na mando, un minister di enseñansa cu ora cu scuch’e papia den Parlamento, bo ta kere cu ta den misa e ta, alabando parlamento, bisa cu e tin respet pa parlamento, cu ta parlamento ta su hefe pero ora cu mira c’un mocion ta bise pa cancela den fomra definitivo e idea di independisacion, ta coy e mocion aki pone un banda.
Un mocion cu a haya 18 voto, caminda esunnan cu a keda sin vota ta Endy Croes kende a laga sa cu e lo no sostene ningun mocion cu AVP trece dilanti, y sr Ricardo Croes di RED kende logicamente ta sostene su minister.
E mocion a wordo acepta pero tog e minister ta insisti pa trece incertidumbre pa e trahadonan ya cu awe por tende cu no nan ta keda ambtenaarm, nan ta bay ter beschikking, y ta mesun discusionnan cu nos tabata tin pero e minister a gewoon dal bay cu su plannan, sigui pa dilanti y no kibra cabes mes cu locual a wordo discuti den e mocion y gewoon pone e mocion un banda y ta sigui cu su plannan,” lider di fraccion di AVP, Marlon Sneek a declara.
